رەزا شوان
سەرۆکی تیـمەکە و ئەوانی تری تیـمەکە، ئەم ماڵەیان بەجـێهـێـشت، بۆ ئەوەی خانووە رووخـاوەکانی تر بگەڕێـن. بە هـۆی هەنـدێک هـۆکارەوە، سەرۆکی تیمەکە بە ناچاری گەڕایەوە بۆ خانـووە تەبخـبووەکەی ژنە گەنجە مـردووەکە. جارێکی تریش ئەژنۆکانی دادان و قـۆڵی لـە رێـگەی شەقـە تەسـکەکـانـەوە درێـژکـرد، بـۆ پـشکـنـیـنی رووبـەرە بچـووکەکەی ژێـر تەرمەکە. لە ناکاودا، بە جـۆش و خـرۆشەوە هـاواری کـرد، منـداڵ، منـداڵـێکی سـاوا لەژێـر تەرمـەکە دایە.
فەڕۆخ نێعمەتپوور
ساڵانی ساڵ تێپەڕی. ئیستا ئیتر پیاوێکی گەورەساڵ بوو. ریش و سمێڵیشی ماش و برینجی کردبوو. رۆژێ لە مەلەوانگەیەک بەڕووتی لەبەر ئاوێنەیەکدا راوەستابوو. چاوی لە جەستەی خۆی دەکرد، کە لەپڕ نیگای چووە سەر شوێنە ناحەزەکەی خۆی. بە تەعەجوبەوە بینی کە رێک لە هی باوکی دەچێ،… لە قنی رۆژی فۆتەکە. هەر وەک ئەوەی باوکی تووکن و شل و زل. سەرەتا تێکچوو. پاشان بزەیەکی هاتێ. بیری باوکی کەوتەوە کە لەمێژبوو مردبوو. باوکی، دوواساڵەکانی تەمەنی ئەوەندە بێدەسەڵات و داماو بوو، نەبێتەوە. هەر بەو قنەیشەوە مردبوو کە ئەو ساڵانی ساڵ لەوە پێش لای وابوو نەیبوو و کەچی هەیشیبوو! یاخود بەو قنەوە کە ئەم لای وابوو باشتر وابوو باوکی نەیبووایە.
فەڕۆخ نێعمەتپوور
گەڵا لەژێر پێمدا خشەی دەهات، دەنگی خوێندنی باڵندە دەبیسترا، لە ئاسمان پەڵەهەورێک سپی سپی تێدەپەڕی. هەناسەیەکی قووڵم هەڵمژی و، بە ئەسپایی دامەوە دەرەوە. دەستێکم بە سەروسینگ و بە شانو باهۆی خۆمدا هێنا،… نا، خراپ نەبوو، هێشتا بەهێز و توند و تۆڵ بوون! بەخۆم گوت تەمەن تەنانەت ژمارەیش نیە. ئەوسا بزەکەم بوو بە پێکەنین. درەختەکان بە گوێی یەکتردا چرپاندیان. گوێم لێبوو یەکیان گوتی لای وایە وەک ئێمە دەتوانێ هەموو بەهارێک بژیەتەوە!
غەفوور ساڵحی
ئەمجاریش ملم سووڕاند. چاوێکی دیم بە ژوور و وەتاغەکەمدا خشاندەوە. هەموو هی خۆم بوون. وەک خۆی. هیچ شتێک نەگۆڕابوو: «ئەقەلی کەم، دەزانم کە لە ماڵی خۆمم.» ئەوەی جێی گۆڕابوو، تەنها کراسە هەڵوسراوەکە بوو. ئەویش ئێستا لەبەر دایکمدا بوو. دایکم تێگەیی: «دەی بۆ وا تماشام ئەکەی ڕۆڵە؟ ئاها ئەتگوت دایە ئەو کراسە قەسرییەت زۆر لێ جوانە.» هیچم بۆ نەگوترا. نەمدەتوانی. ئەگەر بمتوانیایە، پێم دەگوت: «ئاخر دایە گیان، خۆ فریانەکەوتی ئەو کراسەت ئەوەندە لەبەر کەی...»
فەڕۆخ نێعمەتپوور
بۆ پاییز، مامۆستا لەبەر تەختەڕەشەکە بە دارەکەی دەستی ئاماژە بە نەقشەی دونیا دەکا و، دەڵێ ئێرە رۆژهەڵاتە، ئێرە رۆژئاوا، ئێرە باکوورە و ئەوێیش باشوور. من بیری ئەو رۆژەی هاوین دەکەمەوە، دەست هەڵدەبڕم و دەپرسم داخۆ ئەگەر فڕۆکەیەک لە پشت دیوارەکەی ماڵی ‘خا سوعدا’وە بەرەو ماڵی حاجی برایمی بەزاز بفڕێ، لە رۆژهەڵاتەوەیە بەرەو رۆژئاوا، یان بەپێچەوانەوە؟ هێشتا پرسیارەکەم تەواو نەبووە کە منداڵ دەستدەکەن بە پێکەنین. مامۆستا تووڕەدەبێ و، بێدەنگیان دەکا. پاشان بە تاوانی پرسیاری بێ ئەدەبانە دەمباتە بەر تەختە رەشەکە، رێک لە ژێر نەقشەی دونیا چەند شووڵی چاکم تێدەسرەوێنێ و لە پۆل دەرم دەکا. کاکی مودیریش دەمنێرێتەوە بۆ ماڵەوە و، دەڵێ دەبێ بۆ سبەی لەگەڵ باوکم بێمەوە.
فەڕۆخ نێعمەتپوور
خۆشحاڵم کەبابیش خەیاڵە. لەبەر ئەوەی دەتوانی لەدەستی قوتار ببی. هەرچەندە بگەڕێتەوە و مێشکت داگیربکاتەوە، ئەوا بۆ ماوەیەکە. لەم کاتانەدا بەخۆم دەڵێم مێژوو خۆ هەر رابردوو نیە، داهاتوویشە، بۆیە بیر لە داهاتوو بکەوە. ئیتر بیرە لە ئایندە دەکەمەوە. ئایندەیش دەکرێ بە بێ کەباب بێت، وەک چۆن بە بێ هەموو ئەو بیرە مەزنە مێژووییانەیە کە وەک گوتم کاتی خۆی هەبوون. بەڕای من هەڵکەوتێکی سەیریشە کە کەباب و ئەوان پێکەوە لەدایکبوون و… بەڵام پێکیشەوە نەمردن. کەبابێک کە هەر ماوە و هەر بۆنەکەی لەهەندێ شەقام و کووچە و کۆڵاندا دێت و دەڕوا. نا… شتێک پێموابێ هەڵەیە.
عەلی حەمەڕەشید بەرزنجەیی
لەنەورۆزدا گشت ئاسوودەین... بەشداری ئەو یادە دەکــەین تێکەڵ دەبن هەموو دەنگێک... دەبن بەیەک هەمــوو ڕەنگێک وەکــــــو چیــا بەهێز دەبن... دژی زۆردار ڕادەوەســـتن مامــــەیـارە مامـــــەیـارە... لە لای هەمــوان شکـــۆدارە خـۆزگە خـۆزگە مامـــەیارە... کـــە جوانترین شوێنی شــارە دەیانکرد بە سەیرانگای شار... پڕ چیمەن و گــــوڵ و گوڵــزار ئەوســـا دەبوو بەجێی پشوو... هەمــوو کـــات ڕازاوە دەبــوو منداڵیش بۆ یـــــــاریکردن... بۆ خۆشیی و کــات بەسەر بردن بۆی دەهاتن لـــەگشت لاوە... یاری بکـــــــەن بە خــولیاوە خۆزگەی ئێمە ڕوون و دیارە
رەزا شوان
کە ئەم قـسانەم کرد، کاکم ساردبووەوە. بۆ ماوەیەک داما و بێـدەنگ بوو. وا دیاربوو قـسەکانـم کاریـلـێکـردن. بەزەیی بـە دوو کەوەکەیـدا هـات. ئیـنجـا زەردەخـەنـەیـەکی ناسکی کرد و باوەشی لێدام، سەرمی ماچکرد. چوو بە لای قەفـەزەکەوە و دەرگاکەی کردەوە و هەردوو کەوەکەی ئـازادکرد. کەوەکان دایان لە شەقـەی باڵ و هەڵـفـڕین و رۆیشـتن و لەچـاو ونبـوون. ئینجا کـاکـم بە پێـیەکـانی، قـەفـەزەکەی شکانـد.
فەڕۆخ نێعمەتپوور
یەکەمین پێش‌بینی ئەو ئەوە بوو کە هاوین، یەعنی چوار مانگ دووای زیندانی کردنەکەی لە ژێرخانەکە، میوانی تریان لە هەمان شارەوە بۆ دێ و ئەمجارە دەچن بۆ پارکی شار. لەوێ باوکی بەناچاری دەبێ بەستەنی بۆ میوانەکان و بۆ ئەمیش، کە ئەو رۆژە لە رووداوێکی سەیرو سەمەرەدا لەگەڵیان دەبێ، بکڕێ. ئەم کە یەکەم جارە لە ژیانیدا ئایسکرێم دەخوا، ئەوەندەی پێ خۆش دەبێ و ئەوەندەی پێ گەشکە دەبێ کە جورئەت دەکا داوای دانەیەکی تر بکا. دیسان لە دووای لێدانێکی باش بۆ ئێوارە دەیخەنەوە هەمان ژێرخان کە تیایا توانای پیش‌بینی کردنی داهاتوو تێیدا سەری هەڵدابوو.
فەڕۆخ نێعمەتپوور
شەو خەو بە نیگابانەکەی کۆشکی کرێملینەوە دەبینم. لەکاتی تێپەڕینی سەرۆکدا بە دزییەوە قۆپچەیەک لێدەکاتەوە و بۆمی فڕێدەدا. چ گەنجێکی جوان و قۆزە! دوگمەکەیش، بەپێچەوانەی هەواڵەکانی دوێ شەو، وەک ئەوەی خۆم قاوەییە. بەحەواوە بەدەم پێچ و لوولخواردندا لەبەر تیشکی چرا کلاسیک و گران بەهاکانی سەقفەکەدا دەدرەوشێتەوە. بەدەم بزەیەکی شێتانەوە خۆم هەڵدەدەم بیگرمەوە کە هەڵدەکەوم. قۆپچە قاوەیی و گران بەهاکەی کۆشکی کرێملینیشم لێ وندەبێ. خوایە من چ بەدبەختم! من چ بەدشانسم!
لە ئینگلیزییەوە: سایتی قەڵەم
یەکەم رۆژ کوڕە سی و حەوت بزماری داکوتی. لە حەوتووەکانی داهاتوودا، بە گوێرەی زاڵبوونی بەسەر توڕەییەکەیدا، ژمارەی بزمارە داکوتراوەکان کەمیان کرد. کوڕەکە تێگەیشت زاڵبوون بەسەر توڕەییەکەیدا ئاسانترە لە داکوتانی بزمار بە نەردەکەدا.
