ما 7987 مهمان و بدون عضو آنلاین داریم

نەڵە حەسەن

من نازانم

گڕ و کڵپەی ئەم ئاگرە

لەسەر سینگی کام سبەینێ دادەمرکێتەوە

یان / ئەم چاوشاڕکێی ژیان و مردنە

لە کام نوختەدا دەوەستێ

 

لە سەردەمی کۆڕۆنادا

(ئێمە کاتمان نییە بۆ مردن)

ناڵە حەسەن

١

لەم زەمەنی کۆڕۆناو
نیگەرانی و ترس و تەنیاییەدا
ژیان بێڕەحمانە
لەنێو زەڵکاوی مردن ڕاکشاوە
ئێوەش / جێژوانگەکانتان پڕکەن لە ماچ
گوڵدانی گوڵەکانیش پڕ لە خۆشەویستی
پەنجەرەی خەونەکانتان
بخەنە سەر گازەرەی پشت
بە ڕێنووسێکی نارنجیش
لە سەر دەرگای ماڵەکانتان / بنووسن
ئێمە کاتمان نییە بۆ مردن ...!

 

٢

لەم زەمەنی
بێهۆشبوونی باران و
نەزیفبوونی بەرائەتدا
ژیان بەسەرخۆشی
لەسەر پشتی شەپۆلەکانی مردن ڕاکشاوە
ئێمەش / با میلی کاتژمێرەکان بگەڕێنینەوە دوا
با بازنەی گەڕانەوەکان هەرسووڕ بخۆنەوە
تا دەگەینەوە ئەو نوختەیەی
بە ڕەهایی / دەرگای ماڵەکانمان دەکردەوە
بۆ / خەونە خرپنەکانی خۆشەویستی و
زەردەخەنە زگماکییە زێڕینییەکان
با بازنەکانی گەڕانەوەش هەر سووڕبخۆنەوە
تا دەگەینەوە ژێر تریفەی
ئەو شەوە شەونماوییەی
لەگەل میلۆدییە نەرمەکانی مرۆڤبوونمان
مەست مەست
بەیەکەوە
بەدەم هەڵپەڕین و سەماکردن
دەمانگوت / ئێمە کاتمان نییە بۆ مردن...!

 

 

(هێشتا کات ماوە بۆ خەون بینین)

 

لە باکووری بێهوودەییمەوە

لە کاتژمێر بیست و پێنجی تەنیاییم

وا بە تەنیشت جەستەی مردنەوە

جگەرەیەکم داگیرساندووە و بیر لە دوێنێم دەکەمەوە

دوای نەرمە زەردەخەنەیەکی شیرین

بە دوکەڵی جگەرەکەم

لەسەر لێوەکانی با / بە ڕێنووسێکی شین

مەسیجێکت بۆ دەنووسم و دەڵێم

هاوڕێ / هێشتا کات ماوە بۆ خەون بینین...!

 

 

 

(ئەلف و بێ ی عەشق)

 

من نازانم

گڕ و کڵپەی ئەم ئاگرە

لەسەر سینگی کام سبەینێ دادەمرکێتەوە

یان / ئەم چاوشاڕکێی ژیان و مردنە

لە کام نوختەدا دەوەستێ

بەڵام ئەوە باشدەزانم / لە دواجاردا

ژیان چۆک بە مردن دادەدا ‌

 وەکوجاران

لە / خۆرەتاو و خاک و خەون

ئاوس دەبێتەوە

دووانەیەکی نێر و مێی چاوگەش / دێنێتەوە

بە مەقەسێکی شەونمی ناوکییان دەبڕێ

کراسی تریفەیان دەکاتەبەر

بە مەمکۆڵەکانی گوڵەگەنم ژیریان دەکاتەوە

بە دەسترازەیەکی ئاوریشمین دەیابپێچێتەوە و

لەنێو بێشکەی سەوزایی ڕایاندەژەنێ

هەر لە ڕۆژەکانی یەکەمیش

بە زمانێکی شیرینی شەبەنگی

فێرە ئەلف و بێ ی عەشقییان دەکا...!

 

 

                                                              

 

 

گەڕان بۆ بابەت