ئەبسوردیسم و پرۆژەی رزگاری
رەنگە هیچ کەسێک و هیچ کۆمەڵگایەک بە قەدەر ئەو کەس و کۆمەڵگایانەی وا گرفتاری کێشە و نەهامەتی و گیر و گرفتن، لە بیری دۆزینەوەی ریگاچارەدا نەبن. دۆخی لەم چەشنە، کەس و کۆمەڵگای گرفتار ناچار دەکا کە زۆر بە پەلە لە بیری بینینەوەی رێگای دەربازبووندا بێ.
هەڵبەت ئەم کاردانەوەیە، کاردانەوەیەکی سروشتیە. هەوڵێک کە رەنگە زیاتر لە هەر شتێکی تر لە غەریزە و لە پاڵنەرە دەروونییەکانەوە دێت، بەڵام هاوکات کێشە لەوەدایە کە دەرباز بوون تەنها پرۆژەیەکی "جەستەیی" یان هەوڵی خۆڕاپسکاندن بە شێوازی خۆبەخۆ نییە. بە تایبەت لە سەردەمی ئێمەدا کاتێک باس لە دەربازبوونە گەورەکانە، ئیدی زیاتر لە کرداری غەریزی و جەستەیی، کرداری بیر و ناسین و پلان دێتە ئاراوە. رەنگە بتوانین بڵێین "دەربازبوون" ئەنجامی کاری هاوبەشی ئەم دووبەشەیە: واتە کردە و بیر، بە پێداگرتنی زیاتر لە سەر بەشی دووهەم واتە بیر.
لێرەوە گرینگیی زیاتری بیرمان بۆ دەردەکەوێ. ئەوانەی بە جیددی بیر لە رزگاری دەکەنەوە، ئەو کەسانەن کە "بیرکردنەوە و ناسین" دوو خەمی سەرەکی ئەوانن. ئەمەیش پرۆژەیەکی سادە و ئاسان نیە. لە کاتێکدا هەموو شتێک بە هۆی پێشکەوتنی زیاتری زانیاری و زانستەوە رۆژ بە رۆژ ئاڵۆزتر و پڕماناتر دەبێ، ئیتر خۆبەخۆ خودی "رزگاری"ش دەبێ بە پرۆژەیەکی ئاڵۆزتر و هێزبەرتر.
هەڵبەت بیرکردنەوە و ناسین جاری وایە شان لە شانی ئەبسوردیسم واتە پووچگەرایی دەسوون. وەک چۆن "ئاڵبێرت کامۆ" دەڵێ: "بۆ مرۆڤی پووچگەرا ئیدی شیکردنەوە و دۆزینەوەی رێگاچارە، بابەت نیە، ئەوەی بۆ ئەو بابەتە بریتیە لە ئەزموونکردن و وەسفکردن."
بەڵام رەنگە هەستی پووچگەرایی بەشێکی پرۆژەی رزگاری بێت. بە تایبەت کاتێک مرۆڤ نائومێد دەبێ لە هەندێ لەوانەی وا باس لە پرۆژەی رزگاری دەکەن. لێرەدا ئیدی بیرکردنەوە و ناسین دەگاتە فریا بۆ ئەوەی بیرمان بکەوێتەوە کە رزگاری مرۆڤ لە نەهامەتییەکان، پرۆژە و رەوتێکی بەردەوام و بێ سنوورە.
سایتی قەڵەم
٤ ی ئاپریلی ٢٠١٥