شێعر و پەخشان

پێشەوا کاکەیی

شەو و خولانەوە بە دەوری پرسیاردا

پێشەوا کاکەیی

شەو، کە ماندوو بوو:
چاوەکانم، دەکاتە دوو باڵ و دەفڕێت.
بۆوەی خەیاڵ بە چنگێک خۆڵەمێشەوە:
لە هەناوی خۆیدا هەڵگرێت!.

*

شەو، شوێن دەکاتە خاڵی خولانەوە:
بە دەوری پرسیارەوە.
ڕۆژیش، سووتانی خۆی دەخاتە:
ئەستۆی زەوینەوە!

*

شەو، حەزی لە چەرەساتە.
عەتارد و زوهرە و زەوی، 
تا ئەوانی دی...
وەک نۆک و گوڵەبەڕۆژە و فستەق،
دەخاتە بەر دانی فەلەک.
بەدیار قسەی نەستەق!

*

شەو، هێندە بە تروسکایی ئەستێرە بنازێت:
مانگ، لە داخان بە تەنوورەیەکەوە دەردەکەوێت.
بۆیە چەندین نێزەک...
دڵی لە لێدان دەکەوێت!

شەو، هەر حەز دەکات: بە سوننەتی بمێنێتەوە.
ئەستێرە و مانگیش، بە کێش و سەروا بهێڵێتەوە.

*

شەو، لەوەتی هەیە: لە دونیای عاریفاندا بووە.
زیکری کردۆتە ئەستێرە و،
ترێفەی مانگ، بە ڕۆح و،
نێزەکیشی هەر فەنابوون بووە!

*

شه‌و، له‌وه‌تی چۆته‌ دونیای مۆدێرنه‌وه‌
پێی شه‌رمه‌ بڵێ:
یه‌كه‌م جار: عاشقی چه‌رخی به‌ردین بووم.
دووه‌م جار: فتیله‌ و،
سێیه‌م جار: فانۆس و،
چواره‌م جار، بڵێ:
بۆ ئه‌به‌د تووشی سۆزانییان كردم!