ئەرشەد عاصى
هەر یەکەیان؛رۆندکەکان تنۆک تنۆک
لە جێگەیان،
ماچێکی قوڵی گەردەن و رامووسانی مەمکیان دەوێ،
گریان
ئەرشەد عاصى
من دەگریم و زەردە ناپشکوێ لە لێوم
هەر پەشێوم
چون تاراوگەی چر سیاهیم چاوەرێی میهری تۆ دەکا ،
تا ئازەری عەشقێکی سوور بەرپابکا ،
ئەو کات دەوەستم لە گریان .
هەر رۆندکێکی رشتوومە
هەر هەنسکێ بە وەچکوی پشکۆی گڕ لە ناخ،
خەڵوزی منداڵدانی ئەتوون
لە ئەستۆی داخ،
سەراپا توند گرکانێکی گوژم و ئالۆزی سینەی شاخ،
کولاکێکی گڵوکوێز لە روومە
بە چەشنی قەیس دیلانیم لە هەر کاتێ
هەموو ساتێ
کە بە گێژەلۆکەی گەشتێ لە بیابانەوە کەوتوومە.
هەر یەکەیان ؛
رۆندکەکان تنۆک تنۆک
لە جێگەیان،
ماچێکی قوڵی گەردەن و رامووسانی مەمکیان دەوێ،
ژوانێکی پەمەیی پر مەی
لە کەنار مێیەتیت شەوێ.
سپێدەی بەیانی؛ فەرهوود
کۆچی سەودا دوور گەلێ دوور ...
ئاوێتەت بم ،
ئاوێتەت بم ،
ئاوێتەت بم
نەشمیلەکەم تا نەفخی سوور…
ئەوسا دەوەستم
کە شۆخیت دەڕژێتە دەستم،
جا وەرە قاپی ئەوینت بۆم واڵاکە
تاکو کلۆخم گوڵچین و
بە پەتۆ مینشەمیەکانت عەتردارکەم ژین و گيان
ئەگەرنا تا جوانەمەرگیم
گەردوون پڕ دەکەم لە گریان!
