ما 7141 مهمان و بدون عضو آنلاین داریم

ئارى زێندینى

ئێمە بە هیچ جۆرێک مەبەستمان ئەوە نییە هونەرى کوردى لە هونەرى مرۆڤایەتى بکەینەوە پێمان وابێ هونەرمەندى کورد سوود لە تاقیکردنەوە دەوڵەمەندەکانى هونەرى رۆژئاوا وەرنەگرێ ئەوەندەى بەتەنگ ئەوەین هیوامان وایە لە پاشەرۆژ هونەرى کوردیش لە نێو هونەرى رۆژهەڵاتیدا بناسرێتەوە.

 

 

نەژاد عزیز سورمێ تەمەنێک لە سەلیقە و پیشەیبوون و بەردەوامى

  ئارى زێندینى

 

نەژاد عزیز سورمێ، تەمەنێک لە سەلیقەوپیشەیبوون وبەردەوامى، 40 چل ساڵ لە کایەى ڕۆشەنبیرى و سەلیقەى هونەرى و ئەدەب و ڕۆژنامەگەریى کوردى و شیعرو وەرگێران و حەزى هونەرى وشێوەکارى وکولاژ بەردەوامى لە ڕۆیشتن  هەردەم  وزەو تواناوشانى خۆى دەداتە بەر کاروبەرهەمە ئەدەبیەکان هەرچەند قورسیش بێ هەڵوێست و بۆچوونى خۆى هەیە. لاى نەژاد ئەدەب و رۆشەنبیرى وهونەر کات بەسەربردن و شتێکى تایبەتى نییە بەڵکو بۆ مرۆڤایەتیە و خزمەتێکە بۆ پیشەکەى و نەتەوەکەى. فەرهەنگى کوردى و وشەى کوردى و رۆشەنبیرى کوردى سوودى زۆرى لێدەبینێت و هەگبەى هونەرو رۆشەنبیرى کوردى دەوڵەمەند کردووە. نەژاد عزیزسورمێ  زۆربەدیقەت و هەستیارو وردە کە ئەوەیان نیشانەى سەرکەوتوویى ودەوڵەمەندى بەرهەمەکانییەتى لە ژیانى ئاسایى وسرووشتى خۆیشى هەروا دێتە بەرچاو . من خۆم بەسەرنج و تێبینیە تایبەتیەکانى و سەرنج و تێبینیەکانى هونەرى و رۆشەنبیریم بە جیاوازم بینیوە. بە ئەستێرەیەکى گەش لەنێو ئەستێرەکانى تر شاعیر شاعیرە، رۆژنامەنووس رۆژنامەنووس و سەرنووسەرو هونەرمەندى شێوەکارى و کۆلاژ پێشەنگە خاوەنى زیاتر لە (30 ) کتێبە زۆر گرنگى بە کتێب دەدات دیارە کتێبیش بڕوانامەى باڵاى هەر نووسەرێکە . شەرعیەتدانە بەنووسەر لەڕوویى پیشەیى و دانپێنان ، هەروەک شاعیرى گەورەمان (عەبدوڵا پەشێو) دەفەرموێ (گرنگى کتێب لەوەیە کە خواش کتێبى هەیە) ئێمە دەمرین و ووردوخاش دەبین بەڵام کتێب هەردەمێنێ !

                                            (مژارى پیاوماقوڵان لە دیوەخانان !)

    پێش ئەوەى و بێ ئەوەى من بیڵیم (نەژاد عەزیزسورمێ ) کێ یە؟ بەهرەوپیشەکەى ولە چ بوارێکى رۆشەنبیرى وئەدەب هونەرى دەست وپەنجەى نەرم کردووەوسەنگەرى داناوە و چۆن باسکراوە لەوچاوپێکەوتن وگفتوگۆیانە بەدیاردەکەوێت کەلەگەڵى  کراون  لە زۆر لەو رۆژنامەو گۆڤارانەى لە هەرێمى کوردستان هەن وکەسایەتیە ئەدەبى و رۆشەنبیرەکان لەگەڵى ئەنجامیان داوە بە نموونە:

- گۆڤارى کاروان ساڵ (2000) – نەژاد عەزیزسورمێ ، شاعیرورۆژنامەنووس وشێوەکارى کۆلاژ.

- گۆڤارى ڕامان ساڵ (2001) سازدانى ئازادعەبدول واحید- نەژاد عەزیزسورمێ،شاعیرى نوێخوازە ،وەرگێڕە،رۆژنامەنووس

پتر لە سى ساڵە لەنێوان ژان وهەژانى وشەى گەواراى کوردیدا دەژى و دەتوێتەوە .

- گۆڤارى هەرێم ساڵ (2006) سازدانى فۆاد سدیق- نەژاد،شاعیرانە ژیاوە بەڵام بە شیعر نەوەستاوە کارى وەرگێران وشێوەکارى وڵێکۆڵینەوەى قوڵى رۆژنامەوانى .

- رۆزنامەى (نداء الرافیدین ) 1996 ، سازدانى ئەحمەد البو رشادە – الاستاژ (نەزاد عزیزسورمى) ،من الممپقفین الکرد متعدد المواهب فهوشاعر و ێحفى وباحپ لە اهتمامات فى فن تشکیل و مترجم.

- گۆڤارى هەنار ساڵ 2010 سازدانى حەمەکاکەڕەش- نەژاد عزیز سورمێ، سەرەتا بەشیعر دەستى پێکردو دواترهاتە سەر وەڕگێران و لە وێنەکێشاندا کارى گەڵێک سەرنج ڕاکێشى لە کۆلاژ کردووە .

 

                                   (دەرچوونى رۆژنامەى کوردى رۆژانە  خەونى من بوو!)

     نەژاد رۆژنامەوان ولێکۆلینەوى رۆژنامەوانى و کتێبى بەنرخى رۆژنامەوانى زۆر پیشەیانەو شارەزاى رێساو یاساکانى رۆژنامەوانى شیکردۆتەوە لە رووى تەکنیک وهونەرى وئاداب وئەتەکێتى رۆژنامەوگۆڤار،رۆژنامەگەریى بینراوبیستراو لە رابردوو ئێستادا لە مێژووى رۆژنامەگەریى کوردى نەژاد رۆژنامەوان پیاسەومیوانى هەمووکوچەوکۆڵان وجۆگەورووبارى رۆژنامەگەریى بووەو شارەزایە بەدانانى چەندین کتێب لە بوارى رۆژنامەگەریى ولێکۆلینەوى رۆژنامەگەرى بەگشتى و رۆژنامەگەرى کوردى بەتایبەتى وەبەتایبەتیش لەدوایى ڕاپەڕینى (1991) زۆر لەخەمى رۆژنامەگەریى کوردى بووە بە نووسینى ئەو وتارو لێکۆلینەوە رۆژنامەگەریانەى بڵاوى کردۆتەوە. لەڕێى رۆژنامەورۆژنامەگەریەوە زۆر خەمى زمانى کوردى بووە دەیەوێت خزمەتى زمانى کوردى بکات بە هەموولایەک خەمى لێ بخۆن ،ئەوەش ناشارێتەوە رۆژنامەگەریى کوردى لەڕیى سیاسیەکان وحیزبەسیاسیەکان دەستى پێکردووەوگەشەى کردووە هەر ئەوانیش بەلاڕێیان دابردووە لە بێلایەنى و سەربەخۆیان دوورخستۆتەوە هەروەک (نەژاد)  لە وتارێکى رۆژنامەوانى خۆى لە رۆژنامەى (خەبات) بەناوى (میدیاى کوردى لە بازنەى گەمەکانى سیاسیدا) دەڵێ: (سیاسەتوان ورۆشەنبیرى کوردى بەچاوى خۆت لە سەرێکەوە ئەوهەموو قوربانى وچیانشینى وبرسیەتى وکڵۆلیەى بینى لە پێناوکوردوکوردستان کەچى زمانەکەى خۆى لاى گرنگ نەبێت کەیەکێک لە هەرە کۆڵەگەکانى ناسنامەوگەشەسەندن و پەرەدانە بە بزافى رۆژنامەگەرى ومیدیا بە گشتى) هەروەها دیسان لەو وتارە دەڵێ (من وەختى خۆى لە کۆرێکدا  لە یەکێتى نووسەران لە 1991 لە شەقڵاوە، گوتم: لاى سیاسیەکانى ئێمە زمانى عەرەبى بزانن و ئەگەر شڕە ئینگلیزىەکیشى لە پاڵ بێ گرینگ نییە کوردى بزانى! کەچى یەکێک لە کۆڵەگەکانى بوونى هەرنەتەوەیەک زمانە تکا دەکەم پێم نەڵێن کۆنەپەرست وناسیۆنالیست)

     

 

     نەژاد  زیاتر لە هەشت (8) کتێب داناوەو بڵاوکردۆتەوە لە بوارى رژنامەگەریى کوردى و رۆژنامەگەریى بە گشتى،

دیارترینیان ( رۆژنامەگەریى کوردى ورۆژنامەنووسى کورد- ساڵى( 1984) ، ( ئاژانسى دەنگوباسى کوردستان – ئاداک – 1991)(برایەتى یەکەمین رۆژنامەى کوردى ساڵى -1991)، (درەختى بنکۆلکراو – پەنجەنوومایى رۆژنامەنووسیانە – ساڵ –( 1995) نەژاد عەزیزسورمێ ، هەردەم بۆچوون و هەڵوێستى خۆى هەبووە بەرامبەر ئەوناماقولیانەو  شاشیانەى بەرامبەر رۆژناگەریى کوردى دەکرێت و بەڕاشکاوى بۆچوونى خۆى دەردەبڕێت لە سەر میدیایى کوردى و میدیا ئەهلیەکان کە باوى سەندووە لەم رۆژگارە کەدەبێتە هۆى ناشرینکردنى میدیا بە گشتى،هەروەک لەو وتارەى رۆژنامەى خەبات لە ساڵى 2018، دەڵێ (ئەو میدیا ئەهلیانە کەخۆیان ناساندووە لەو کەناڵانە کە بە کوردى پەخش دەکەن نەیانتوانیوە بێلایەنى خۆیان بپارێزن ، میدیایى کوردى هەرچى بکات نەیتوانیوە لە ئاڕاستەى باربووکەر بێتە دەرەوە کەسیش ئامادە نییە بە پارەى خۆى تەشهیر بە خۆى بکات دژى بەرژەوەندى خۆى بووەستێ) کەواتە (نەژاد) هەر قسەناکات بەلکو بەهەڵویست وخەمخۆرو خۆى بەرپرسیار دەزانێ بێجگە لە پیشەى رۆژنامەگەریى لەڕێى رۆژنامەوە کاڵى وکرچى رۆژنامەگەریى کوردى و زمانى کوردى راست بکاتەوەو چارەسەرى بۆ بدۆزێتەوە کە ئەمە یەک لە تایبەتمەندیەکانى (نەژاد عەزیزسورمێ) پێدەناسرێتەوە، پیشەى نووسەرورۆشەنبیرى ڕاستەقینەیە

 

                          (نیشتمانى ئەبەدى و هەتاهەتایى من بێ گومان شیعرە)

  شاعیر نەژاد عەزیزسورمێ، دەڵێ: (من بەخۆم پێش شیعر نووسین خەمێکى هەسپێکراو دەمگرێ هەستێکم وەبەردێنێ لە قوڵایى ناخى ناخمەوە هەستدەکەم ئازارم دەدات)، کەواتە نەژاد شاعیرە پێرفێکت نەوەک تەنها سەقافەتى شیعروشاعیرانە قوڵبوونەوەو هەستیارى و خەیاڵ لە شیعرەکانى دەبینرێت وەلەوەش زیاتر هەردەم خەریکى وەرگێرانى شیعرى شاعیرانى جۆراوجۆرە لەهەموونەتەوەجیاوازەکان، شیعرەکانى نەژاد تایبەتمەندى وەرگرتووە لەبەر وشەوزاراوانەى کە بەکاریدەهێنێت خوێنەر دەخاتە بیرکردنەوەو تێڕامان! زوو هەستپێدەکەى ئەوە شیعرى نەژاد عەزیز سورمێ! شیعرى شاعیرانیش بناغە و ڕێسایى بۆ دەستورى زمان و ڕێزمان . زیاتر لە (10) کتێب شیعروهۆنراوەى چاپکردووە بێجگە لە وەرگێڕانى کتێبى بێگانە بۆسەر زمانى کوردى چەندەها هۆنراوەى تر لە رۆژنامەوگۆڤارەکان بڵاوکردۆتەوە. نموونە: (کەویە بەفرەکانى دۆزەخ – 2016) ، (تەلارسازوهەندێ لە زیندەخەونەکانى – 2018) ( تاڤگەى مەند – 1987) چەندانیتر. شاعیر داهێنەروخوڵقێنەرى وشەیە چەکى شاعیر زمانە بزانێ چۆن دەریدەپەرێنێ! بۆیە نەژادى شاعیر چەندین وشە لە شیعرەکانیدا هەیە لاى شاعیرەکانیتر نابینرێت خۆى دایهێناوە، نموونە (خانەى خەفەت، هیواى تۆزاوى، فەسەفەى ئەشکەنجە، مانگى بێ هێلانە ،قوربانگەرا ، بەزمگەرا ، هەتاوى شەش دەر، هەورى ئاسندار، ئادەمگەلى، موچڕکپۆش، شەپۆڵى نوور، جەژنیەتى نەژاد، ئاودەنگى ڕیگا، بەفرکوش، وشکەسەما، بایکۆتى وشە، پەند گۆیى ، ئاوى کڕ، ژەنگارى پەتیارەیى، زەنەکە، بانگۆش، ئەفسانەى سیلاکبوو، رۆژپەڕ، تەنپۆڵایى، ئاستانە باران، بایکۆتى پەرەگراف، باڵانسى باران،ڕاقەنا،کێڵگەى نێرگز)، هەروەها لەزۆربەى شیعرەکانى وشەى بیانى وەک ئینگلیزى یا لاتینى بەکارهێناوە کە ئیشارەتە بۆ رووداوێک کارەساتێک مانایى شیعرەکەى خۆى پێ تەواوکات و مانا بدات، ئەمەش دەست باڵایى شاعیرەورۆشەنبیریەکى گشتى شاعیرە هەردەم ئاگادارى شیعرورۆشەنبیرى جیهانى و بێگانەیە،بەلاى ئەو شیعر بۆ کات بەسەر بردن نییە شیعر هەردەم ووزەى زیاتروکەشفکردنى دەوێ ! تەنها موڵکى شاعیروچەندکەسان نییە بەڵکو موڵکى گشتە. نموونە لەو زاراوە بیانیانە (لیڤەرنۆ، ئۆسنابرۆک، سیدۆر، فاندۆم، ئینەنا، وایت هاوس، ئەنکیدۆ، فرێندلى فایر، ئیلیەت، سکلیا، ڤرلین، وایتمان، کامۆ، براک، سیزان ، دالى، ئاراگۆ )

                      (سەلیقەیەکیترى شاعیر ، وەرگێڕانى شیعر بۆ زمانى کوردى)

 وەڕگێڕان لاى نەژادى شاعیر بوارێکى دى بۆ خۆرۆشەنبیرکردن و زیاترشارەزابوون لە زەریایى شیعروهۆنراوە، خوگرتن بە شیعروعەشقى شیعر وایلیێکردووە هەرتەنیا بەشیعرى خۆى نەوەستێ بەڵکو شیعرى جۆراوجۆروشاعیرى جۆراوجۆرى هىڵبژاردووە بۆ وەڕگێڕان بۆ سەر زمانى کوردى هەم خۆى پێ دەوڵەمەند بکات هەم خوێنەرى کوردیش ئاشنا بکات لە دوا مۆدیل و گەشەى شیعرى بێگانە! ر نەژاد دەڵێ: (لە وەرگێڕانى شیعر هەمیشە هەوڵمداوە بیکوردێنم زۆر قەسیدەم وەرگێڕاوە جێگایى نووسینی قەسیدەیەکى خۆمى گرتۆتەوە)ئەمە مانایى پڕبە پێستى سەلیقەو پیشەیبوون دەگەێنێ لە کارى هەر نووسەروشاعیرێک! زۆربەى وەرگێرانەکان لە زمانى عەرەبى بووە هەندیکى لە فارسى، شاعیرەکانیش جۆراوجۆرن ناسراون وەک: (ڕامبۆ، ئاودیک ئاساکیان - ئەرمەنى، قاسم سعودى، داریۆش، عەبدول وهاب بەیاتى، فازل عەزاوى، عاتیفەیێ گورگین، فلەیەح حسن عێراقى، ئۆهان گریگۆریان، ئەلیاس عەلەوى ئەفغانى، فەریدون موشیرى، لانگستۆن هیوز ئەمریکى، حاتەم ئەلئەنسارى، مەناهل ئەلسهرور – ژن – سورى، تاگور، چارلز یۆگۆفسکى، خوسرەوى گوڵسورخى، گریگۆرکۆرسۆ).

     

 

                             (رۆژا مێرو خورتا هەلات – هاتن ژ هەوارێ تە وەلات)

      شاعیروشیعر، خاسیەت و بابەتێکی گرنگى هەیە لاى زۆربەى شاعیران رەنگى داوەتەوەو شاعیرانیش بێهەڵوێست نەبوون بەرامبەرى هەم وەک هەڵوێستێکى نیشتمانى هەم وەک دەست باڵایى لە هونەرى شیعر ئەو لایەنەیان فەرامۆش نەکردووە ئەویش لایەنى (هەڵوێستى نەتەوەیى و نیشتمان پەروەرى) لاى زۆربەى شاعیرانى کۆنى کوردى باوبووە میللەتى کوردیان پێ جۆشداوەوبەخەبەرهێناوە لە ئاست ئەو ناعەدالەتى و ناماقولیانە و زوڵمەى لێیکراوە، شاعیر (نەژاد عزیز سورمێ) ئەو هەڵوێستە کوردانەونیشتمانپەروەرانەى لە بیرنەکردووە لە شیعرەکانى بەدیاردەکەوێت بەتایبەت لە دیوانە شیعرى (کەویە بەفریەکانى دۆزەخ) دەتوانین چەند نموونەیەک بەرچاو بخەین، وە :

بەرەو کوێ

دیسان مەنفا

ئەى مێشکى ماندوو سەرى بە ئێش

لە تاریکیەوە بۆ تاریکى چ برینێک سارێژ دەبێت

ئاى نیشتمان

چەندت غەدر لێکردین

چەندمان غەدر لێکردى

------------------------------------------------------

کۆبانێ

رووبارێکى شێتە

بەخوڕ بەناو قەدى چیاکانەوە تێدەپەڕێ

کۆبانێ رووبارێکى شێتە

هەورى هەموو دونیاى لە کۆڵە

ترسى هەموو دونیاى لە کەنارى سەوزیدا هەڵگرتووە

رۆژانە بە شەباقەى سنگى کچانى چاوگەش

کە لە گوڵى سەرەتایى بەهار دەچن

دۆزەخ پێشانى مەرگهێنەران دەدەن

------------------------------------------------------------

شەنگال

ئاسمانێکە لەسەر چیاوە

ئەستێرەى رەنگاورەنگ بەسەر هەموو دونیاوە

لە نەخشى مافوور دەچێ

شەنگال بزەى بۆ خەرمانان گەڕاندەوە

شەنگال

نیشتمانى بەبێ نیشتمانان بەخشى

-----------------------------------------------------------------

چ مەرگێکى جوان بوو

مەرگى ئالان

ئەو منداڵەى بە هیواى پایسکیلێک

دەریایى تەى کرد

هەر لە باوەش فریشتانیشدا

زۆرى نەبرد

ئالانى بچکۆلانە پیربوو

ئیتر پایسکیلى لەبیرچوو

چ مەرگێکى جوان بوو

مەرگى ئالانى پیر بە منداڵى

مەرگى ئالانى منداڵ بە پیرى

-----------------------------------------------------------

                                           (بە خێربێى سەرەتایى شێتیەتى!)

هەروەک لاى زۆربەى شاعیران قۆناغێک لە قۆناغەکان نائومێدى و ڕەشبینى باڵى کێشاوە بەسەر شیعرەکانى سەرجەم شیعرەکانى نائومێدى و ڕەشبینى یان شاعیر هەیە لە نائومێدى و ڕەشبینى بووەتە شاعیر بەوە ناسراوەو دیوانە شیعرەکەى کۆمپلیت نائومێدى و ڕەشبینیە ئەمەش لە شیعرى کوردى و جیهانى شوێنى تایبەتى خۆى هەیە وەک ڕێچکەیەک و ئایدۆلۆژیایەک شاعیران لەسەرى دەڕۆن وەک ڕێبازێکى ئەدەبى لە شیعر پەیڕەوى دەکەن شاعیرەکەشى پێدەناسرێتەوە، لە شیعرەکانى (نەژاد) ئەمە دەبینرێت، نموونە:

بەڕێیکدا دەڕۆیشتم

پەیبردن

بۆچى نیشانەى بەدبەختییە

تێگەیشتم ئێوارەى تەمەڵ بۆ ڵا ڵە

دڵت بەرد ئاسا

کانگایى سۆزونەرمى

ئێستا تێگەیشتم

-------------------------------------------

تۆ بیر لە ژەهرى جەستە

لە لێوارە بەلەنجەکانى لەزەت دەکەیەوە

تۆ بیر لە من ناکەیەوە

------------------------------------------------

نیشتمان ئەوە نەبوو

لە چیرۆکێکى کورتمان نووسیوە

بە داخەوە

جارێکى دیش

بە داخەوە نیشتمان خاچێکى ئاسنین دەرچوو

لە شەڕ لە مەرگمان زیاترلێ نەدى

بەداخەوە سەت هەزارجار بەداخەوە

نیشتمان سەیرانگایى بەهاران نەبوو

-----------------------------------------------------------------

      باران نیە

     تاوێکى لەو رەنگە گەرمیش نییە

   من ئەو چەترەم بۆ هەڵگرتووە؟

  بە خێربێى سەرەتایى شێتیەتى !

-------------------------------------------------------------------

قەسیدەیەک

وەک کۆلیسترۆل

لە دەمارەکانمدا گیربووە

نازانم کەى دەمکوژێ

--------------------------------------------------

هەرچى رەنگى دونیا هەیە

بە پەتێکەوە هەڵدراونەتە ئاسمان

ئێستا زانیم ئاسمان بۆچى

جوانى جارانى نەماوە

---------------------------------------------------------------------------

 

                          (فۆتۆگراف و تەشکیل ، شەش پێشانگایى کۆلاژ!)

نەژاد عەزیز سورمێ ، لە پاڵ شیعرو وەرگێڕان و رۆژنامەگەریى، حەزوخولیاى تووندو عاشقانەى بۆ وێنەو شێوەکارى و هونەرى فۆتۆگراف وهونەرى کۆلاژ هەیە،چەند وتارولێکۆلینەوەى نووسیوەو کتێبى ( سەرەتایەک بۆ تێگەیشتن لە هونەرى شێوەکارى ) ، کتێبى (کۆلاژ – مێژوو ، تەکنیک ، هونەر )  و کتێبى ( ساوى شتان ) لە بوارى فۆتۆگراف چاپ و بڵاوکردۆتەوە بۆ زیاتر شارەزابوون و پیشەیبوون لەم بوارە ، هونەرى وێنە و شێوەکارى لاى ( نەژاد ) شیعرە بەڵام بە ( هێل و وێنە و کامێرا ) ، هەروەک ( نەژاد ) خۆى دەڵێ : (هونەرى شێوەکارى هەمیشە ماڵى دووەمم بووە ئەگەر چى من سنوورێکى رەهام  لە نێوان شیعرو تەشکیل نەدیوە ) سەرچاوە گۆڤارى رامان – ساڵ 2000، یان دەڵێ ( لە ئەساسدا من هەر لە منداڵى و لە قۆناغى سەرەتایى ئارەزوویى رسم کردنم هەبوو ) هەر گۆڤارى رامان سال – 2000، وە دەربارەى کۆلاژ دەڵێ : ( کۆلاژ رەهایى و شەفافیەت دەبینم نیشتمانم بوو ، نیشتمانێکى پڕبە سیەکانم )،  یان لە پارچە شیعرێکى خۆى دەڵێ ( کۆلاژ هونەرى پاڵاوتەو، سوختەى دیدار ئاخربوون) بۆیە دەبینین شاعیر( نەژاد) توانیویەتى بە شیعرولەشیعرێکى حەزوعەشقى وێنە و شێوەکارى وێنا بکات وەک تابلۆیەکى شێوەکارى بنەخشێنى چوارچێوەیەکى تابلۆ بێتە بەر چاو،بەتایبەت لە شیعرى (ئەزموون ) لە سەرەتا ئەو روونکردنەوە دەدات ، دەڵێ: (ئەم هۆنراوە خۆى دەگونجێ لەگەڵ تاقیکردنەوەى دى وەک پۆستەرە شیعر شێوازى ( هایکۆ ) من بۆ روونکردنەوە دەڵێم هچ کامیان نین بە قەد ئەوەى هەوڵدانێکە کە نیشانى چەند تابلۆیەک بەهۆیەکى دى دەربڕێن ) شیعرەکانیش ئەمەیە :

1-هێلانە

شەباقەى برینە

یا چاڵە خوێنە

یا دەمى بورکان

-----------------------------------------

2- ( . . . . . )

کلاورۆژنەى شیشەبەند

چەند تاڵە تیشکێ

مرۆڤێ دەستى بە قاچیەوە گرتووە

سەرى بە دیوار هەڵپەساردووە

----------------------------------------------------

3- ستیل لایف

درەختى ڕا قەناو

کەلاوەى خانوو

باولێ تەنەکە

 لێفەى شڕى لە بیرکراو

--------------------------------------------------

4- کۆمەڵێ جۆگە

دوو کانى وشک

تیشەبەردێک

سیمایێ ماندوو

دوو باڵى لە ڕاست و چەپ ڕوواوە

----------------------------------------------------------------

5- ژیان سەیرە

سەیرە ژیان

 بە ڕێیکدا بڕۆى

لە تابلۆیەکى  ئەبستراکت بچێ

-------------------------------------------------------

6- دڵنەوایى

کچێ رەشپۆش

لەسەر بانێژە وەستاوە

تریفەى مانگ و

ورشەى ئەستێرە کۆدەکاتەوە

--------------------------------------------------------------

7- چیاێیکە خەریکە دەڕمێ

چەند دەستێ سنگى خۆیان داوەتە بەر

چەند دەستێ ناهێلن چیایەک بڕمێ

--------------------------------------

  دواتر شاعیر، بۆ زیاتر پیشەیبوون و قوڵبوونەوە لە بوارەکەى لە کتێبى (سەرەتایەک بۆ هونەرى شێوەکارى –چاپى سێیەم) دەڵێ (ئێمە بە هیچ جۆرێک مەبەستمان ئەوە نییە هونەرى کوردى لە هونەرى مرۆڤایەتى بکەینەوە پێمان وابێ هونەرمەندى کورد سوود لە تاقیکردنەوە دەوڵەمەندەکانى هونەرى رۆژئاوا وەرنەگرێ ئەوەندەى بەتەنگ ئەوەین هیوامان وایە لە پاشەرۆژ هونەرى کوردیش لە نێو هونەرى رۆژهەڵاتیدا بناسرێتەوە)

گەڕان بۆ بابەت