و: نه‌ژاد عزیز سورمێ
سیاسییه پیشه‌وه‌ره‌كان داره‌مه‌یتان ساف ده‌كه‌ن
تۆش له غوربه‌تدا نه ده‌ژی و نه ده‌مری
له چاوه‌ڕوانی ڕێگران
به‌فر و ئه‌ستێره و یاقووت ده‌تشێرنه‌وه.
نۆ چوارینه له عه‌بدولوه‌هاب به‌یاتییه‌وه
و: نه‌ژاد عزیز سورمێ
(1)
مه‌سیح خوێنی خۆی به پاشای كه‌ر فرۆشت
شۆڕشگێڕانیش به‌زین و
چیهان له چڵپاودا نوقم بوو
ڕووپۆشی گاڵته‌جاڕانیش كه‌وتنه زڵكاوه‌كانی شه‌رمه‌زاری .
(2)
ئاگرم له‌سه‌ر پێخه‌فی خۆشه‌ویستیم كرده‌وه
له‌به‌ر ده‌رگایاندا به‌جێی هێشتم پیر ببم، بڕوخێم
سووتاندمی ، به خۆڵه‌مێشییه‌وه فووی پیا كردم و
وه‌كو مار له دیواریدا نووستی.
(3)
هه‌ڵكه‌ن به وشه په‌تكیان پساند
كه‌وتنه تاریكایی بیران
پا‌ڵه‌وانی سه‌ر په‌تكانیش
وه‌ك توانه‌وه‌ی شێوانی شه‌و له ڕۆژدا، توانه‌وه.
(4)
سوكرات!
ده‌بێ مانایه‌ك ببینینه‌وه و به‌روانكه‌كان بدڕێنین
ده‌بێ بیبڕێنینه‌وه
ده‌بێ پێستی مه‌ڕ دابماڵرێ و ئه‌و شێواویه بدرێته به‌ر شواڕكان.
(5)
سیاسییه پیشه‌وه‌ره‌كان داره‌مه‌یتان ساف ده‌كه‌ن
تۆش له غوربه‌تدا نه ده‌ژی و نه ده‌مری
له چاوه‌ڕوانی ڕێگران
به‌فر و ئه‌ستێره و یاقووت ده‌تشێرنه‌وه.
(6)
ده‌بێ هه‌ڵبژێرین
باهۆز بگرین و سفران بخوولێنینه‌وه
ده‌بێ مانایه‌ك له پشت بێهووده‌یی ژیان بدۆزینه‌وه
ژیان له‌م جه‌مسه‌ره داخراوه‌دا خۆكوژییه.
(7)
ده‌بێ ڕۆما بڕوخێ و
له‌و خۆڵه‌مێشه‌دا گه‌ش بێته‌وه ئاگر
برووسكه دره‌ختان بسووتێنێ
ده‌بێ له‌م كۆرپه‌ڵه مردووه‌دا له‌دایك بن شۆڕشڤان .
(8)
ده‌گه‌ڕێینه‌وه ، كێ ده‌زانێ، ناگه‌ڕێینه‌وه
بۆ دایكه زه‌مین كه كۆرپه‌ی ئومێدی چاوه‌ڕوانكراوی
له هه‌ناویدا هه‌ڵده‌گرێ و قووڵی ئه‌م خه‌م و به‌ڵێنانه
په‌پووله‌ی بوون به ده‌وری ئاگرماندا ده‌خوولێته‌وه.
(9)
مردووی زیندوو بێ نان و بێ ئامانج
فوو له خۆڵه‌مێش ده‌كا
به‌ڵكو نیشاپور
وه‌ك مار به‌رگی خه‌می داده‌كه‌نێ و كۆت ده‌پسێنێ.
* له (عبدالوهاب البیاتی – الاعمال الشعریة) به‌شی دووه‌م
بڵاو كردنه‌وه‌ی (المؤسسة العربية للدراسات والنشر) –
بێرووت 1995 ل 95 .