ما 6958 مهمان و بدون عضو آنلاین داریم

سۆران محەممەد

بۆن دێ
بۆنی مەرگێکی بۆر
مەرگێکی بۆگەن
بێ ئەوەی لە گۆڕستانەکان
هیچ کەسێ تەرمێ بنێژێ...

 

بۆنی مرۆڤ

 سۆران محەمەد

 

لە گشت لایەکەوە بۆن دێ
بۆنی مرۆڤ؛
ئەو کاتانەی وەکو تەختەدار
سەرئاو دەکەوێ
شەپۆل دەیباو
لە کەنارێکا
جانەوەر
لەدەوری کۆ دەبێ
.
بۆن دێ
بۆنی باروت نا!
بۆنی مرۆڤ
کە بەشەو شەقامەکان
وەك چراخان دەڕازێننەوە
لە ڕۆژیشدا غەڵبەغەڵبەکان
لە چایخانەکانەوە بەرز دەبنەوە
کەس نابینرێ
ئاوازێ بۆ ژیان بڵێتەوە
.
لەبەردەرگای ڤێللاکانا
(مڵە)کان قەتارەیان بەستووە،
لە حەوشەی قوتابخانەکان
کرمە لیقەکان
گروپ گروپ بارگەیان خستووە،
دووپشکەکان
لە کونی گۆڕەکانەوە
سەریان دەرهێناوە
بەرەو بۆنە ناخۆشەکە
بەدیوەرەکانا هەڵئەزنێن.
لەهیچ پەنجەرەیەکیشەوە
تارمایی مرۆڤ نابینرێتەوە
.
بۆن دێ
بۆنی مەرگێکی بۆر
مەرگێکی بۆگەن
بێ ئەوەی لە گۆڕستانەکان
هیچ کەسێ تەرمێ بنێژێ..
درەختی سەر ڕێگاکانیش
کە هەر بە ئاوی ئەو شێرەیە ئاودران
کە چەرچەفەکانی
ژووری نووستنی کۆشکی
پێ دەشۆردران
هەر دڕکەزی ئەگرێ
کەس ناتوانێ لەسایەیان ستار بگرێ
.
مێروولەکان لە دوورەوە-
لەسەر لوتکەی چیاکانەوە
گاڵتەیان بەو حەشاماتە دێ
كە ڕۆژێ بوو
توتنیان دەبرد بۆ خان
ڕۆژێکی تریش
خەنجەری دەبان،
کەچی ئێستا وەکو شوشەیەکی بەتاڵ
لە سەری خۆیان دەگەڕێن!
.
لە هەموو لایەکەوە لوورە دێ
لوورەی مرۆڤ،
مرۆڤیش نابینرێتەوە..
لەو دەڤەرەی
دەڵێی میحنەتخایەک بوو
وا چۆڵ بووە
یان مەنفایەك
هیچ کەس جێی تیا نابێتەوە
.
لوورە دێ لەو میحنەتخانەیە
کەسیش، کەس ناناسێتەوە
وەك  ئەو کەسەی؛
دوێنێ بەو ڕێگایانە ڕۆی
ئەمڕۆ شوێنپێی سڕدرابێتەوە
.
هەموو دەموچاوەکان
وەك یەکن
هیچ کەس، کەس ناناسێتەوە
لە هەر لاوە
یەك سەدا بەرزەبێتەوە
ئەویش ‘مەرگ’ ـە
بەسەر خاکی
وشکەڵانی گیانەکانا
لەناکاو بەر دەبێتەوە

١٥/٦/٢٠٢٠

 

گەڕان بۆ بابەت