سایتی قەڵەم
١٣ ئاپریلی ٢٠١٧
بۆ خوشک و برا نا؟
بۆ خوشک و برا نا؟لە ئەدەبییاتی کوردیدا، لە بەشی چیرۆک و رۆمان، باسکردن لە باوک، دایک، باوەگەورە و دایەگەورە زۆر باوە. نووسەران یەکجار حەزیان بە بەکارهێنانی ئەوانە وەک کەسایەتی ناو بەرهەمەکانیان. بەڵام هەر بەو رادەیە ئێمە وشەکانی 'خوشک و برا' نابیستینەوە. بۆ؟ رەنگە هۆکارەکان ئەمانە بن:ـ دایک، باوک، باوەگەورە و دایەگەورە لە تەم و مژێکی نەناسراو و ئەفسانەیی بە دەوری خۆیاندا بەهرەمەندن،ـ سۆزی ئێمە بۆ ئەوان زیاترە،ـ ئەوان خاوەن ئەزموونی پترن لانیکەم بە هۆی تەمەنیانەوە، ئەو ئەزمونەی نووسەر حەزدەکا بە بیانوی نووسین بەسەریبکاتەوە، یاخود هەوڵی دۆزینەوەی بداتەوە،ـ وەک نەوەی پێش ئێمە، بۆ ئێمە نەناسراوترن،ـ هەستی بەزەییمان بۆیان بەهێزترە، وە چونکا هەست دەوری سەرەکی لە دەقی ئەدەبیدا دەبینێ، کەواتە سەرنجمان زیاتر بۆی رادەکێشرێ،ـ بەڵام رەنگە لە هەمووی گرینگتر دەنگدانەوەی وتنی وشەکانی دایک، باوک، دایەگەورە و باوەگەورەیە لە زمانی کوردیدا لە چاو وشەکان خوشک و برا. بۆ روونکردنەوەی زیاتر با گوێ بدەینە ئەم رستانە: ـ "دایکم دەیویست بە فرمێسک دونیا دەستەمۆ بکا."ـ "باوکم لە رەگەزی درەخت بوو، رەگی لە ناو زەوی رەق و سەری لەناو بای بۆشدا."ـ "باوەگەورە دمنەکەی لە ژیانی پیری خۆشتر دەویست!"ـ "دایەگەورە لەمێژبوو رقی لە ئاوێنە بوو، لەو ساڵەوە مەمکی چرچی تێکەوت."سەبارەت بە خوشک و برا:ـ "خوشکەکەم (یان خوشکم) وەک ئێمە جیرەی نەبوو،... پێیان نەدەدا."ـ "براکەم کە شەوان دەهاتەوە، بۆنی گاڵتەی هاوڕێکانی دەدا." گوێ لە ئاوازی 'خوشکەکەم' یان 'براکەم' بگرن لەچاو وشەکانی 'دایکم' و 'باوکم' و... . ئاهەنگ و ئاوازی ئەو دوو واژەیە پێمان دەڵێ کە ئەوان لەچاو چوارەکەی تر کەمێک جیاوازن! بۆیە جاری وایە ریتم و ئاهەنگی وشە دەتوانێ دەوری سەرەکی لە هەڵبژاردنەکاندا بگێڕێ!
- توضیحات
- بازدید: 625
