ما 745 مهمان و بدون عضو آنلاین داریم

ناڵە حەسەن

فرمێسکەکانی سەرگۆنات

دەبن بە بارانێکی ئەوینی

پێدەشتە وشکهەڵاتووە شەقارشەقاربووەکانی

ئەو دڵە غەریبەی من / تەڕ تەڕ دەکەنەوە...!

 

کۆترێک لە جنسی فریشتە

ناڵە حەسەن      

 

کاتێک دەبم

بە پەیکەرێک لە تەنیایی

پەنجەکانم سڕ دەبن و

جەستەم لەخۆم یاخی دەبێ

پەراسووەکانم دەچەمێنەوە

دەمارەکانی ئارەزووم 

دەبن بە پشکۆی / ئاگرێکی شین شین

لەودەمەدا

لەنێو ماڵەکەی خۆم

بە نیگایەکی پڕ لە نوورەوە

لە پەنجەرە کراوەکەی ئومێدەکانمەوە

سەیری جووڵەی مێروولەکان و

پیاسەی ماسییەکان و

بازنەکانی گەردەلوول و  

زەردەخەنەی دوورترین

وردە ئەستێرەکان دەکەم

لەگەڵ تەمە سپییەکانیش

گۆرانییە بروسکەییەکان دەڵێمەوە

تۆش / لە هەرکوێیەکی ئەم گەردوونە بیت

لەنێو دەربەندی عاشقانی باکووری مانگ

یان لەنێو کۆڵانەکانی پەلکەزێڕینە

لەنێو ئەشکەوتە ڕووناکەکانی سەوزایی

یان لەژێر ساباتی پەرییەکانی دەریا

لەنیو میترۆکانی هەور

یان / لەبنار کێوە سەختەکانی

شەپۆلە بێهوودەکان

لە هەرکوێ بیت /

ئەی کۆترە سپییە قاقۆڵ سوورە فریشتەییەکە

 وەکوجاران

وەک ڤینۆسە ئەفسانەییەکانی

نێو کتێبەکانی عەشق و

نێو چیڕۆکە

بەرئاگردانییەکانی

شەوە یەڵداییەکان

یان وەک /

تابلۆیە تاوسییە تەوتەمییەکانی

نێو گۆڕەپانی بەهەشت

یان / وەک فریشتە

باڵا سنەوبەرییە گوڵفرۆشەکانی دۆزەخ

لەنێو خەیاڵە ئیرۆسییەکانم

دەردەکەوییەوە

منیش / نەرم نەرم

قژی خاوت شانە دەکەم و

سەربەکۆشی خەونەکانت دەکەمەوە

هەرلەودەمەش

فرمێسکەکانی سەرگۆنات

دەبن بە بارانێکی ئەوینی

پێدەشتە وشکهەڵاتووە شەقارشەقاربووەکانی

ئەو دڵە غەریبەی من / تەڕ تەڕ دەکەنەوە...!

 

 

گەڕان بۆ بابەت