نه‌ژاد عزیز سورمێ
كێ ده‌زانێ
دڕنده‌ی به‌چۆكداهاتوو
له یاده‌وه‌ری دابڕێندراوی گه‌ل دا
ناگه‌ڕێته‌وه
تا پێش كۆتایی هاتنی ئه‌م سه‌ده‌یه
زیندووان بخوا؟
چه‌ند لاپه‌ڕه‌یه‌كی به‌غدایی نادیار
دوا قه‌سیده‌ی شاعیری ناسراو عه‌بدولوه‌هاب به‌یاتی
و: نه‌ژاد عزیز سورمێ
(١)
چاوی ئاژاوه‌گێڕی شه‌و له به‌غدا
دووچاری شێتیی عاشقانی كردم
باوكم لێی ده‌پرسیم:
(( چی به نهێنی ده‌خوێنمه‌وه‌و
ئه‌وه‌ی ده‌یخوێنمه‌وه
له ژێر پێخه‌ودا ده‌یشارمه‌وه‌و
تا به‌ره‌به‌یان بێدارو
گوێ له بانگی كه‌ڵه‌شێری
هاوسێكان ده‌گرم؟
به خه‌مه‌وه وه‌ڵامم ده‌دایه‌وه:
بابه ، ئه‌و كتێبانه ده‌خوێنمه‌وه
چه‌ندان چه‌رخه قه‌ده‌غه كراون
له‌وانه هه‌ندێ كتێبی جادووگه‌رین
هه‌ندێ كتێبی سیمیا و
هه‌ندێكیش له‌باره‌ی مردووان و
شارستانییه‌ته‌كانی ئاو
هه‌وڵ ئه‌‌ده‌م
خۆڵه‌مێشی خۆشه‌ویستی
بكه‌م به زێڕ، یا به وشه
ئه‌وانی دیش
به فرمێسكه‌كانم نۆژه‌ن بكه‌مه‌وه
یا له‌سه‌ر به‌رپه‌ڕی سپیدا
لاوانه‌وه‌ی شاژنه‌كانی ئوور بنووسم
كه ئه‌گریجه‌ی زێڕینی یه‌كێكیانم
له مۆزه‌خانه‌ی به‌رلین بینی
وێنه‌ی ئه‌وی دیشم
له مۆرێكی قوڕین
ده‌یگڵۆفم
برووسك، كۆڵانه‌كانی به‌غدا
ڕووناك ده‌كاته‌وه))
دایكم له‌و دیو ده‌رگاوه ده‌پاڕایه‌وه
ئه‌و ده‌رده بپه‌ڕێنم
به‌ڵام شێتییه‌تیم هه‌ر مایه‌وه‌و
عه‌شقم زیاتر.
(٢)
له گۆڕستانی (غه‌زالی) دا
مردوو ده‌گریان
دره‌ختیش ده‌گریان
گیانه‌وه‌رێكی دزێو
له پشیله‌یه‌كی گه‌ڕ ده‌چوو
پێیان ده‌گوت (زه‌بزه‌ب) (*)
گۆڕی تازه‌مردوویه‌كی هه‌ڵده‌دایه‌وه
ده‌ستی مردوو ده‌رده‌كه‌وت
ده‌یقرتاند
ژنێك به جل وبه‌رگی گوندییان ده‌یبینی
ده‌قیژێنێ
لێ گیانه‌وه‌ری برسی
له كرۆژتنی نێچیری به‌رده‌وام ده‌بێ
تۆلاز به شواڕك و به داسانه‌وه
له نیوان گۆڕی مردووان ده‌ركه‌وتن
به‌ربوونه گیانی زه‌بزه‌ب
په‌كی كه‌وت و ده‌ستی به میاوه‌میاو كردو
چنگی قرتێنراوی
به ڕووی تۆلازه‌كان به‌رز كرده‌وه
ئه‌عڕابی هه‌ڵاتن
وتی
ئه‌و ساڵانه‌ی نه‌فره‌تیان هێنا
خه‌ڵك برسییه
ئه‌ستێره‌ی دمۆریش
به‌سه‌ر گۆڕستانه‌كانی به‌غدا دا ده‌ڕژێن
كێ ده‌زانێ
دڕنده‌ی به‌چۆكداهاتوو
له یاده‌وه‌ری دابڕێندراوی گه‌ل دا
ناگه‌ڕێته‌وه
تا پێش كۆتایی هاتنی ئه‌م سه‌ده‌یه
زیندووان بخوا؟
(٣)
شه‌یتانی شیعر
به خۆشه‌ویستی ژنێكی زۆر له خۆم بچووكتر
فریوی دام
كه پێده‌كه‌نی و ده‌گریا!
ده‌پاڕایه‌وه له باده‌ی خۆمی بده‌مێ و
فێری نهێنی
گریانی به‌كوڵی
(تار)ی بكه‌م
له‌و وه‌خته‌ی شاعیران ده‌مرن
خانم
له گه‌ڕه‌كێكی میللی به‌غدا داده‌نیشت
له واڵا كردنی لینگان و خواردنی هه‌نجیر
چیتر نازانێ
نیوه‌شه‌و چاودێریم ده‌كرد
ئاره‌زوومی پێ دابمركێنمه‌وه‌و
پێش كازیوه
بگه‌ڕێمه‌وه گۆڕه‌كه‌م
به‌ڵام شه‌یتان
چاودێری ده‌كردم
چاودێری ئه‌ویشی ده‌كرد
فێری ده‌كرد
چۆن به مه‌كری مێینان
هێزی ڕۆح و سه‌رچاوه‌كانی ئاگرم
لێ زه‌وت بكا.
به‌ڵام قه‌ده‌ر
گاڵته‌ی به‌و و
به شه‌یتانی شیعر كرد
من له‌و و له‌میش به‌هێزترم
ئه‌وه‌تا پێشه‌وام غه‌یاسه‌ددینی به‌غدایی
له په‌راوێزی ده‌سنووسه‌كه‌یدا (جادووی مێینه)
ڕایسپاردووم
چۆن مه‌له
به‌م لێشاوه ئینسانییه‌دا بكه‌م.
دیمه‌شق 15-3-1999
ئاماژه
(*) كه مه‌غۆله‌كان چه‌ند هه‌فته‌یه‌ك مابوو بگه‌نه به‌غدا، برسییه‌تی ته‌نگی پێ هه‌ڵچنی بوو
ئینجا له‌باتی ئه‌وه‌ی چاره‌یه‌ك بۆگرفتی برسییه‌تی و قاتیی بدۆزرێته‌وه‌و شووره‌كانی شار به‌هێز بكرێن بۆ به‌ره‌نگار بوونه‌وه‌ی و به‌رپه‌چدانه‌وه‌ی داگیركاران، داروده‌سته‌ی دوا خه‌لیفه‌ی عه‌بباسی ده‌ستیان دایه بڵاو كردنه‌وه‌ی ده‌مگۆ و پاگه‌نده بۆ ده‌مكوت كردنی خه‌ڵك و ناچار كردنیان بۆ ماڵنشینی وپاراستنی ماڵ و مڵكیان كه ئه‌منییه‌ت به‌ره‌و داڕمان ده‌چوو .
له‌و پاگه‌نده‌و ده‌مگۆیانه‌ی (ئیبن ئه‌سیر) باسی ده‌كا: گوایه گیانه‌وه‌رێك نیوه‌شه‌وان ده‌رده‌كه‌وێ گۆڕی مردووان هه‌ڵده‌داته‌وه لاشه‌یان ده‌خوا!
به‌ڵام ئه‌مه‌ش خه‌لیفه‌ی لاوازی له مه‌رگ نه‌پاراست، له‌گه‌ڵ ئه‌وه‌ی بۆ پارێزگاری له خۆی ته‌سلیمی مه‌غۆله‌كانیش بوو .
(**) ئه‌م شیعره‌ی به‌یاتی دوا قه‌سیده‌یه‌تی كه به ماوه‌یه‌كی كورت پێش
كۆچی دوایی نووسیویه‌تی و پاش مردنی بڵاو كراوه‌ته‌وه .
بڕوانه ڕۆژنامه‌ی (المدی) ژماره 1710 .
https://almadapaper.net/view.php?cat=15242
