ما 4113 مهمان و بدون عضو آنلاین داریم

ئەحمەد رەسوڵ

من بەم هەموو ناسکییەوە کوا تاقەتی شەڕی ئەو هەموو دڵڕەقییەم هەیە،

من بەم هەموو جوانییەوە کوا حەوسەڵەی جەنگ لە دژی ئەو هەموو دزێویەی ئێوەم هەیە.

 

منم، کاوەی جوانیی

 

ئەحمەد ڕەسوڵ

 

ئەگەر ئێوە نە تەنێ زەوی، بەڵکو ئاسمانیشتان تاریک نەکردایە،

من بەشی خۆم تیشکم دەبوو.

ئەگەر ئێوە هێندە دڵرەقییتان نەباراندایە،

دڵی منیش وەک سارایەکی بێکەران لە نەرمییدا نەدەبوو.

ئەگەر ئێوە، هێندەی گەردی سەر ڕوومەتی بێگەردی منداڵێک

ئاکارتان لە نێو ئێمەدا دەهێشتەوە،

منیش ئێستا هێندە بێڕەحمانە لە دووریی منداڵەکان و

منداڵەکانیش هێندە دڵهەڵقرچێنەرانە لە دووریی من

نەدەسووتان.

...

ئای چەند بە سەخاوەتەوە پێشوازیمان لێکردن ئێمە و

چ میهرەبانانە هەموو میهری خۆمان پێشکەشکردن.

ئای چەند بەد هاتن ئێوە و چ دزێویتان لە ڕۆحماندا ڕوواند.

ئای چ حیلەبازانە هاتن ئێوە و چ دڕندانە ئەژنۆتان لەسەر سنگمان چەقاند.

...

من بەم هەموو ناسکییەوە کوا تاقەتی شەڕی ئەو هەموو دڵڕەقییەم هەیە،

من بەم هەموو جوانییەوە کوا حەوسەڵەی جەنگ لە دژی ئەو هەموو دزێویەی ئێوەم هەیە.

ئێوە چۆن توانییتان تخوبە دوورەکانی دزێوییش تێپەڕێنن!

ئێوە چ جۆرێک بوون لە خراپیی، کە ئیتر خراپیی لە دەرەوەی تەعریف مایەوە.

ئێوە کوڕی کام پیشەگەرانەی دڵشکاندن بوون، کە هێندە بلووری جوانیی ووردوخاش کەن.

ئێوە چ ڕۆڵەیەکی زۆڵی بێوەفایی بوون، کە هێندە بتوانن خائینانە بژین.

ئاخر خیانەت و دڵشکاندن تا سنورێک دەتوانن هەبن،

ئێوە لەوەشتان تێپەڕاند.

ئێوە چ ئەهریمەنزادەیەک بوون کە ئەهریمەنیش حاشاتان لێبکات.

ئاخر خراپەش تا سنورێک ئەریمەنانەیە،

ئێوە لەوەشتان تێپەڕاند.

...

من کاوەم، هێندە جوانم، لە جوانییدا دەمرم.

من کاوەم، هێندە ناسکم، لە ناسکییدا هەڵدەوەرێم.

...

لە ناسکییدا هەڵوەریین، وەک هەڵوەرینی گەڵا بە شنەیەک،

کێ لە ئێوە دەتوانێ!

لە جوانییدا لە مردن، وەک ئاوابوونی غوباریی دەنگ، دەنگی چڕینی ئەوین،

کێ لە ئێوە دەتوانێ!

توانەوەی من، وەک توانەوەی ئێوارە بە بێدەنگیی لە شەودا،

کێ لە ئێوە دەتوانێ!

من توانیم، لە ناسکییدا، لە جوانییدا، لە توانەوەدا.

...

ئەگەر ئێوە تۆزقاڵێک غیرەت و کەرامەت، هێندەی سەرە دەرزییەک جوامێرییتان بوو بووایە،

من بەم هەموو شەهامەت و جەسارەتەوە، بەم هەموو عیزەتی نەفسەوە نەدەمردم.

 

ژێرنووس:

کاوە، ناوی ئەو کەسەی کە لە هەڵەبجە ڕۆژی ٢٦ ی جولای ٢٠٢٠ لە باخی گشتی خۆی خنکاند، ناوێکی سیمبولیکە بۆ هەموو ئەوانەی دەگەنە ئەو قەناعەتەی کە کۆتاییهێنان بە ژیانیان بە ئارامیی و ڕزگاربوون لە ماندووبوون و تراژیدیای زیندەگییان دەگەیەنێت. جا ئەو هۆکارانەی لە پشت ئەو خودلەناوبردنە چ دەسەڵاتدارێتییە بێباک و نابەپرسیارەکەی بزووتنەوەی کوردایەتی بێت، چ دڵڕەقیی و فشاری کۆمەڵگا بێت یان بێئومێد بوون و بێهێوابوون لە نزیکان و دۆستانێک کە ڕۆژانێک جێگای ئومێد و متمانە بووبن. واتا لە هەر دۆخێکدا کاتێک ئینسان لە دۆخی بێچارەییدا خودکوژی بەبێ هیچ زیانێک بۆ ئەوانیدی دەکاتە ڕێگاچارە بۆ دەربازبوون لە بێئومێدی و ذڵتەنگییە قووڵە بێکۆتاییەکەی جۆرێک لە ئیستاتیکا یان جۆرێک لە بەرائەتی تێدا دەردەکەوێت وەک ئەوەی هەموو ئەوانیتر بەرپرسیار و تاوانبار بن لە ئاستیدا. بەهەرحاڵ ئەم تێکستە دەرکێشانی ئەو ڕەگەزە ئیستاتیکی و ئەو ڕووبەرە لە ناسکیی و پاکییەیە کە دەشێت لە نێو خودی کردەکەدا و هەروەها دەکرێت لە نێو خودی بکەرەکەدا هەبێت. ئەمە ستایشی کردەی خۆکوژی یان هیچ کردەیەکی توندوتیژانە نییە، بەڵکو هەرخۆی ئەو کۆتاییهێنانە بە خود وەک جۆرێک لە غەدر دەبینێت کە هەمووان لە بەرامبەر خۆکوژدا تیایدا بەشدارن بەشێوەیەکی ناڕاستەوخۆ. دیسانەوە وەک دووبارەکردنەوە ستایشی خۆکوژی یان هیچ جۆرێکی توندوتیژی نیە ئەم تێکستە هێندەی نیگایەکی شیعرییە لەو تەنها کەوتنەوەیەی ئینسان لە دۆخی دوورکەوتنەوەی تەواوەتی لە هەمووان و بە ڕاددەیەک کە ئیتر ڕێگای ڕەهای دەربازبوونی لە کۆتی زیندەگی، تەنها لەو کردەیەدا دەبینێت.

ئەحمەد ڕەسوڵ

گەڕان بۆ بابەت