خولیا حسێن
تۆم بیر دێتەوە
جاران تۆ شتە جوانەکانی من بوویت
ئێستاش شتە جوانەکانی من تۆیت
باکم نیە ژیان ڕووتیش بێتەوە لەجوانی
جوانیەکانی تۆ
خولیا حسێن
لەکاتی قاشکردنی سێوێکی سوور
لە ئێوارەی پایزێکی زەرددا
لەگەڵ سپیکردنی پرتاقاڵێکی تەڕ
لەشەوە درێژەکانی تەنیاییدا
لەگەڵ هەڵوەراندنی هەر دەنکە هەنارێکی مزری
شەرابی،سوور
کەهەردانەیەکیان لەنەقێمی ئەنگوستیلەکانی تۆ دەچن
تۆم بیر دێتەوە
کە ڕادەمێنم لە گەڵالەبوونی کڵۆبەفرەکانی
سەرچڵی درەختە ڕووتەکانی نیشتمانی غەریبی
تۆم بیر دێتەوە
کە دەبینم ژنێکی عاشقی
چاو زەردی
دەم بەپێکەنین
باسکی لەقۆڵی هاوژینەکەی هەلکێشاوەو
بەیەکەوە چاوەڕوانی پاسی شار دەکەن
هەر قسە دەکەن و
لە گفتوگۆی یەکتری تێر نابن
تۆم بیر دێتەوە
کە مەرکانەکانم ئاو دەدەم
کە یاری لەگەڵ پشیلەکەم دەکەم
کە منداڵەکانم لەباوەش دەگرم و
ماچیان دەکەم
تۆم بیر دێتەوە
جاران تۆ شتە جوانەکانی من بوویت
ئێستاش شتە جوانەکانی من تۆیت
باکم نیە ژیان ڕووتیش بێتەوە لەجوانی
من هەر بیری تۆ دەکەم
جوانیەکانت هیندەزۆرن
لەگەڵ دنیا بەشیان دەکەم
