ما 3204 مهمان و بدون عضو آنلاین داریم

ناڵە حەسەن

چیتر لە دوورەوە سەیرم مەکە  /وەرە  /جلە شینەکانی مردنم لەبەر داکەنە  /لەژێر بارانی خۆشەویستی  /سەمایەکی سێرناداییم لەگەڵ دابەستە  /بە تەنها جارێکیش بیت  /بە زمانی عەشق بم لاوینەوە

پیاوەتیم دەڕژێتە نێو سێبەرتەوە

ناڵە حەسەن

١

زەمەن دەڕواو

پیاوەتیم دەڕژێتە نێو سێبەرتەوە

دیوارێک لەنیوانمان قسە دەکات

جەنگاوەرێک

لەنێو سەنگەرەکانی مردنەوە

فیشەک بە ئاگرەوە دەنێ

٢

زەمەن دەڕواو

خۆرەتاوی خەونەکانم

دەڕژێتە نێو چاوەکانتەوە

کیشوەرێک لەنیوانمان قسە دەکات

شاعیرێک

لەنێو ماڵی تەنیاییەوە

بە ڕێنووسەکانی تاریکی

قەسیدە درێژەکانی عەشق دەنووسێتەوە

٣

چیتر لە دوورەوە سەیرم مەکە

وەرە

جلە شینەکانی مردنم لەبەر داکەنە

لەژێر بارانی خۆشەویستی

سەمایەکی سێرناداییم لەگەڵ دابەستە

بە تەنها جارێکیش بیت

بە زمانی عەشق بم لاوینەوە

٤

عەشق / پەنجەرەیەک لە مندایە

خەون / قاچەکانم لە سروود گوتن نەکەوتوون

مانگێکی سپی لەنیو شەوەکانم دەردەکەوێ

ئەستێرە مییەنەکانیش بە کۆمەڵ بەدوامەوە نوێژ دەکەن

تۆش دەستم بگرە و پڕمکە لە خۆت

٥

سەفەر / توورەگەیەک لە نائومێدی

پایز / ماڵێک بۆ ئاشتبوونەوە

شکانی ئاوینەکانی ئومێد

هەور پڕبووە لە چیڕۆکەکانی چاوەڕوانی

ڕەشەبا / ڕەش ڕەش تابلۆکانی تەمەنمان ڕەنگ دەکات

تۆش لەنێو جانتای خەونەکانت بۆ ئەبەد زیندانیم کە

لێمگەڕی با وەک هەمیشە بڕژێمە نێو جۆگەلەی کچێنیتەوە

 

                                                              ئایاری ٢٠٢٣

 

گەڕان بۆ بابەت