سەردار جاف
رەنگە کاتێ / تاريک دادێ لە سينەما / لەوێ هەڵکورمابێ و کەسێ نەبێ دەستی بگرێ و بيهێنێتەوە / دەترسم وەک ترسەکەی شەهلا / جادووگەرێ / لە تەليسمی بزواندن و نووسين و سەحرای فێڵاوی خۆی خزاند بێ / لە نێو سيحری خۆيا بيهۆنێتەوە / ناکرێ بفڕێ و / بازێ بێت گوژم و شاتاوڵی هەراسانمان بکا
ئێوارانە ٤١
سەردار جاف
ئێوارەيە و
شەو دوور دوورە
فرسەخە رێيەک بۆ ئەفسانە بوونی رۆح
لە نێوان من و شەهلايە
شەو خۆی لە تەنهایی ئاڵاندووە
ناو بە ناو ون دەبێ و
من و ئەو لە سۆراغ و کنەين
بارگە دەپێچينەوە
تخوب دەبەزێ و شار بە شار عەوداڵ
کون و کەلەبەرەکانی ئودن بە دووی شەو دەگەڕێين
لە رۆشناييا خۆی لێ مەڵاس داوين
سەر شەقام و پارک وێڵ وێڵين
ئەفسانەيەکە و ناخزێتە ئامێز
شەو لە تاريکيا ونبووە
گۆمە قووڵەکان دەکنين
دۆراندۆری دووردوور
سەربانە خرمژنەکانی ئاوایی
رۆژيش لە دەمکەلەوە سۆراغ و ئاخێز
باپيرەگەورەيشمان شەوی هەر نەديتەوە
لە نێو پەڕەی دەفتەرەکان
حەرف حەرف شيتاڵ دەکەين
بە مناڵە بيژوەکانەوە
دەمانەوێ شەو ببينينەوە
دواجار لە ڤيلا سيحراوييەکە
هێندەی دی شەو بووە پەنهانی و بێ شوێن پێ
دەشێ لە نێو نووشتەی فاڵچييە درۆزنەکانی گەڕەکی خۆمان نوقـم بووبێ
رەنگە کاتێ
تاريک دادێ لە سينەما
لەوێ هەڵکورمابێ و کەسێ نەبێ دەستی بگرێ و بيهێنێتەوە
دەترسم وەک ترسەکەی شەهلا
جادووگەرێ
لە تەليسمی بزواندن و نووسين و سەحرای فێڵاوی خۆی خزاند بێ
لە نێو سيحری خۆيا بيهۆنێتەوە
ناکرێ بفڕێ و
بازێ بێت گوژم و شاتاوڵی هەراسانمان بکا
چەپخونی لە چاوەنواڕی خولياکانمانا مت مت بووە
وا دەمانخوا
بە تەيمانی جوانيا گير بووە
ئامێزەکان گەرم گەرم دادێنێ
دەبا ئێمەيش لە نێو خێو و جادوو لە دووی گەڕێين
بەرت نادەم، جێت ناهێڵم و فرياد رەسم
خۆشمدەوێی خۆشەويسترين کەسم
٢٠/ ٦ / ٢٠٢٣
