ما 543 مهمان و بدون عضو آنلاین داریم

ناڵە حەسەن

پایزە و گەردەلوولی مەرگیش  /بە دەوری مەمکۆڵەکانی خاک  /خوول دەخواتەوە / ژیانیش بەسەرخۆشی ڕاکشاوە و  / پیتەکانی ناوی خۆی بیرچۆتەوە / منیش هەرچوار وەرزی  /نێو دەفتەری بیرەوەرییرکانم  /ناو دەنێم پایز و  /بەرلەوەی قەڵەمەکەم دابنێم  /دوا قەسیدەم بەناوی  /"وەرین هەمیشە وەرین" دەنووسم

پایز و سەمفۆنیای لە دایکبوونەوەی خۆم

ناڵە حەسەن

 

پایزە و گەڵاکان

نەرم نەرم دەوەرن

نەرم نەرم بە میلۆدییەکی خەمناک

خەمناک وەک خەونە خرپنەکانی خۆم

گۆرانییە ئیرۆسییەکان دەڵێنەوە

گەڵاکان نەرم نەرم

نیشتیمانی با جێدەهێڵن

دێنە نێو نیشتیمانی

شیعر و خەیاڵە غەمگینەکانی من

 

پایزە و گەڵاکان

نەرم نەرم بە سەمایەکی سەرمەستانەوە

لەودیو شووشەی پەنجەرەکانەوە

بە نیگایەکی زەردەوە

سڵاو لە تەنیاییم دەکەن و

بۆ جەستە وشکهەڵاتووەکەی

نێو مەملەکەتی غوربەتم دەچەمێنەوە

 

پایزە و گەردەلوولی مەرگیش

بە دەوری مەمکۆڵەکانی خاک

خوول دەخواتەوە

ژیانیش بەسەرخۆشی ڕاکشاوە و

پیتەکانی ناوی خۆی بیرچۆتەوە

منیش هەرچوار وەرزی

نێو دەفتەری بیرەوەرییرکانم

ناو دەنێم پایز و

بەرلەوەی قەڵەمەکەم دابنێم

دوا قەسیدەم بەناوی

" وەرین هەمیشە وەرین " دەنووسم

 

پایزە پایز

لە گەڵا وەریوە چاوگەشەکانیش

شمشاڵێکی شین دروست دەکەم

لەبنار  گردە ئاگرینەکانی دۆزەخ

لە جیاتی

لاوکە خوێناوییەکانی جەنگ و

داستانە تراژیدییەکانی خۆشەویستی و

ئەفسانە سیزیفییەکانی نائومێدی

بەستەی هەڵهاتنەوەی خۆرەتاو و

سێرنادای بارانە بەهارییەکان و

سەمفۆنیای لە دایکبوونەوەی خۆم / دەژەنم!

 

گەڕان بۆ بابەت