نه‌ژاد عزیز سورمێ
دیاره پێشه‌كی (وه‌ك نه‌ریتێكی ڕۆژهه‌ڵاتیانه‌ش بێ) له ئه‌ستۆی حكوومه‌ته هه‌وڵ بدات له‌گه‌ڵ لایه‌نه به‌رپرسه په‌یوه‌ندیداره‌كان له ناوه‌ند، هه‌روه‌ها له‌گه‌ڵ ڕێكخراوه خێرخوازه‌كان ئالیه‌تێك بۆ جێبه‌جێكردنی ئه‌و پرۆسه‌یه پێكبهێنرێ و كاری بۆ بكرێ و ئاسته‌نگه‌كانی ئاوه‌دانكردنه‌وه و پێداویستییه سه‌ره‌كییه‌كانی گه‌ڕانه‌وه‌ی دانیشتووانی دێهاته‌كان له‌به‌رچاو بگیرێ ، له پێشه‌وه‌یان مه‌سه‌له‌ی ئه‌من و ئاسایش و ڕێگاوبان و خوێندن و ته‌ندروستی و پرۆژه‌ی ڕاكێشه‌ری گوندییان و نه‌وه‌كانیان و خزمه‌تگوزاری دیكه و هاندانیان به ده‌سپێشخه‌ری له‌بار و به‌كار، به‌تایبه‌تی ئه‌وانه‌ی په‌یوه‌ندییان به كشتوكێڵ و وه‌ناوهێنانی سامانی ئاژه‌ڵه‌وه هه‌یه، هه‌روه‌ها هه‌ڵگرتنه‌وه‌ی مینه‌كان كه له وه‌ختی جیاجیادا له دێهاته‌كانی كوردستاندا چێنراون و تائێستاش كاری جیددی نه‌خشه‌بۆكێشراو بۆ هه‌ڵگرتنه‌وه‌یان نه‌كراوه.
ده‌مانگوت گونده‌كانمان جوانتر دروست ده‌كه‌ینه‌وه
نه‌ژاد عزیز سورمێ
(ئوور) كاول كرا
لاوانه‌وه‌ی )ئوور) تاڵه... به ئێشه.
خوداوه‌ندیش كه ماڵی تێدا خراپ بووه،
له شین و گریانی )ئوور)دا هاوبه‌شه.
داخۆ چه‌ندی دی لاوانه‌وه به ئیشه‌كه‌ت ده‌مێنێ ئه‌ی (ئوور)!
)سه‌ره‌تای هه‌زاره‌ی دووه‌می پ . ز)
له‌و باوه‌ڕه‌دا نیم هیچ پرۆسه‌یه‌كی زۆرداریی ئاكامگر )به چه‌كی كۆكوژیشه‌وه) ئه‌وه‌نده‌ی ڕاگواستنی دێهاته‌كانی كوردستان و وێران كردنیان ، له پاشانیشدا هه‌ڵته‌نكاندن و ڕووخاندنیان كاریگه‌ر بووبن..
وتم پێموانییه هیچ پرۆسه‌یه‌ك به‌قه‌د ڕاگواستنی زیاتر له چوار هه‌زار گوندی كوردستان كاریان له بنه‌ما ئابووری و كۆمه‌ڵا‌تییه‌كانی كردبێت، به‌ڕاده‌یه‌ك ڕه‌نگه تا چوار )تۆ بڵێ ده) نه‌وه‌ی تریش پێ بزانن یان نا كاریگه‌ریی بمێنێ.
به‌ڕاگواستن و ته‌ختكردنی ئه‌و گوندانه، له گرێژنه‌چوونی ڕواڵه‌ته سه‌ره‌كییه‌كانی ئابووریش له‌ولا دانێ ، ڕه‌گه‌زی متمانه‌یشی لای مرۆڤی كورد له‌ق كرد و له مرۆڤێكی به‌رهه‌مهێنیشه‌وه له گوند، بوو به بوونه‌وه‌رێكی به‌كارهێنی، چاو له كۆمه‌كی، ده‌ستبه‌تاڵی، بێ به‌رهه‌م.
ئاخر هه‌ڵخلیسكان و بڕوا له‌ق بوون به ئینتیما و به ئاینده لێره‌وه، به‌و ئه‌گه‌ر و هۆیانه‌وه ده‌ستی پێكرد و ئه‌وه‌ی لێكه‌وته‌وه كه لێی كه‌وته‌وه، كه ئێستاش دوای زیاتر له نزیك سێ ده‌ییه‌ی (ئازادی)، نه‌ك هه‌ر كاریگه‌ریی ماوه، به‌ڵكو به هۆی ئه‌وه‌ی سیماكانی ون نه‌كردووه، متمانه‌یشی لای گوندنشینان له‌ق كرد.
ئه‌مه له‌ڕووی ئابوورییه‌وه، دیاره بۆ باسی كاریگه‌ریی كۆمه‌ڵایه‌تیی و ده‌روونیشه‌وه ڕه‌نگه ئه‌سكه‌نده‌رنامه‌یه‌كی بوێ.
تۆ هه‌ر به‌خۆت بیری لێبكه‌وه كاتێ بنه‌ما ئابوورییه‌كان نامێنن و خه‌ڵكی له زێد و واری باووباپیرانیان به زۆری زۆردار هه‌ڵقه‌نێنن و بێن ئه‌وه‌ی ئه‌نفالیان كرد، ئه‌نفالیان كرد و ئه‌وی دیشیان، له‌لایه‌ك وه‌ك ئاردی ناو دڕك بڵاوه پێكرد و له‌لایه‌كی دیكه هه‌ر كۆمه‌ڵه‌ی له شوێن و جێگایه‌ك هاتبوو، له بیابانان له ده‌وروبه‌رێك جێگیركرد، كه له‌هه‌ردوو دینیان كردن، نه ژیانی شارستانییان پێ به‌خشین نه هی گوندیشیان بۆ مایه‌وه، داخۆ شیرازه‌ی كۆمه‌ڵایه‌تی و ده‌روونی ئه‌و گوندنشینانه چی به‌سه‌ردێ؟ باسی لایه‌نی دیكه ناكه‌م، به نموونه تێكدانی ژینگه به‌ده‌ستی ئه‌نقه‌ست ، كه له خۆیدا تاوانێكی سه‌ربه‌خۆیه.
زامی ڕاگواستن و ڕووخاندنی ئه‌و گوندانه، یاده‌وه‌ری به‌رائه‌تپۆش و سه‌رچاوه پاكه‌كانی منداڵیی هه‌زاران هه‌زاریشی كووشت.
خه‌یاڵ بۆ ئه‌وه ده‌ڕوا دادگا ته‌نیا به‌و تاوانه، )تاوانی ڕاگواستنی گونده‌كانی كوردستان) كه ڕژێمی پێشوو كردی به پێی قانوونی تاوانی دژه‌مرۆڤ و دژه‌سرووشت و ژینگه ئه‌گه‌ر به‌دوایدا بچین ئه‌و تاوانه به نه‌مانی ڕژێمێكی دیاریكراو و هاتنی هیتر - به پێی قانوون - ڕه‌ش نابێته‌وه.
هه‌ر لێره‌وه دانانی پلانێكی شایسته بۆ به‌دواداچوونی ئه‌و تاوانه و هه‌وڵ دان بۆ گێڕانه‌وه‌ی مافی مافخوراوان و ئاوه‌دانكردنه‌وه‌ی ئه‌و گوندانه و بنیاتنانه‌وه‌ی ده‌روونی و ڕۆحیی كۆچپێكراوان و هاندانیان بۆ گه‌ڕانه‌وه و به‌رپاكردنی پرۆسه‌ی كۆچی پێچه‌وانه نه‌ك له‌وانه‌یه به‌ڵكو بێگومان دره‌نگه زوو نییه ، ده‌بووایه له‌گه‌ڵ ده‌سپێكی (سه‌رده‌می ئازادی )دا بیری جیددی لێ بكرابووایه‌وه وه‌ك به‌شێك له ساڕێژ كردنی لانی كه‌می برینه یه‌ك به دوای یه‌كه‌كان و بنیاتنانه‌وه‌ی ژێرخانی نیشتمان و دانه‌وه‌ی به‌شێكی كه‌می قه‌رزی كه‌ڵه‌كه‌بووی چه‌نده‌ها ساڵه‌ی دێهاتنیشینانمان كه هه‌میشه باری قورسیان به‌سه‌ره‌وه بووه.
به‌ڵام ئایا ئه‌و ئه‌ركه له ئه‌ستۆی كێدایه؟
دیاره پێشه‌كی )وه‌ك نه‌ریتێكی ڕۆژهه‌ڵاتیانه‌ش بێ) له ئه‌ستۆی حكوومه‌ته هه‌وڵ بدات له‌گه‌ڵ لایه‌نه به‌رپرسه په‌یوه‌ندیداره‌كان له ناوه‌ند، هه‌روه‌ها له‌گه‌ڵ ڕێكخراوه خێرخوازه‌كان ئالیه‌تێك بۆ جێبه‌جێكردنی ئه‌و پرۆسه‌یه پێكبهێنرێ و كاری بۆ بكرێ و ئاسته‌نگه‌كانی ئاوه‌دانكردنه‌وه و پێداویستییه سه‌ره‌كییه‌كانی گه‌ڕانه‌وه‌ی دانیشتووانی دێهاته‌كان له‌به‌رچاو بگیرێ ، له پێشه‌وه‌یان مه‌سه‌له‌ی ئه‌من و ئاسایش و ڕێگاوبان و خوێندن و ته‌ندروستی و پرۆژه‌ی ڕاكێشه‌ری گوندییان و نه‌وه‌كانیان و خزمه‌تگوزاری دیكه و هاندانیان به ده‌سپێشخه‌ری له‌بار و به‌كار، به‌تایبه‌تی ئه‌وانه‌ی په‌یوه‌ندییان به كشتوكێڵ و وه‌ناوهێنانی سامانی ئاژه‌ڵه‌وه هه‌یه، هه‌روه‌ها هه‌ڵگرتنه‌وه‌ی مینه‌كان كه له وه‌ختی جیاجیادا له دێهاته‌كانی كوردستاندا چێنراون و تائێستاش كاری جیددی نه‌خشه‌بۆكێشراو بۆ هه‌ڵگرتنه‌وه‌یان نه‌كراوه.
به‌ڵام هه‌قه دانیشتووانی ئه‌و گوندانه‌ش بێئومێد نه‌بن و وه‌ك هه‌میشه چاویان له ئاسۆ بووه هه‌ر وابن و له چوونه یاریی ده‌زگاكانی حكوومه‌ت بۆ ئه‌م مه‌به‌سته (ئه‌گه‌ر بیری لێ كرایه‌وه) دوانه‌كه‌ون.
مه‌گه‌ر ئێمه نه‌بووین ده‌مانگووت گونده‌كانمان جوانتر دروست ده‌كه‌ینه‌وه.
