ما 2924 مهمان و بدون عضو آنلاین داریم

و: نه‌ژاد عزیز سورمێ

من دوو پێكه‌نینی كۆنم هه‌یه‌

ده‌مه‌وێ بیانفرۆشم

دایكم وتی : كه‌یفی خۆته‌

به‌ره‌و مام دێوه‌ره‌ چووم و بانگم كرد:

مامه‌... مامه‌

ئه‌مڕۆ پێكه‌نین به‌ چه‌نده‌؟

كێ پێكه‌نین ده‌كڕێ و فرمێسكان ده‌فرۆشێ؟(*) 

و: نه‌ژاد عزیز سورمێ

 

هاواری دێوه‌ره‌ له‌ سه‌رانسه‌ری گه‌ڕه‌كێدا

ده‌نگ ده‌‌داته‌وه‌

خه‌به‌ردار ... خه‌به‌ردار !

ئه‌وه‌ی (به‌ختیار)ی هه‌یه‌

ئه‌وی (شادی) یا (خه‌م)

یا (فرمێسكی كۆن)ی هه‌یه‌‌ بۆ فرۆتنێ...

 

ڕام كرده‌ لای دایكم

پێم وت:

من دوو پێكه‌نینی كۆنم هه‌یه‌

ده‌مه‌وێ بیانفرۆشم

دایكم وتی : كه‌یفی خۆته‌

به‌ره‌و مام دێوه‌ره‌ چووم و بانگم كرد:

مامه‌... مامه‌

ئه‌مڕۆ پێكه‌نین به‌ چه‌نده‌؟

وتی:

پێكه‌نینی منداڵان به‌ لیره‌یه‌كه و

هی پیره‌مێردان به‌ هه‌زار لیره‌!

ئێمه‌ به‌ پێی ته‌مه‌ن ده‌كڕین.

 

سه‌یرم به‌و جیاوازیه‌ی نرخ هات

پێم وت:

مامه‌ پێكه‌نین هه‌ر پێكه‌نینه‌

ئه‌و جیاوازییه‌ چییه‌؟

یان تۆ چونكه‌ من منداڵم

فێڵم لێ ده‌كه‌ی

پێی وتم، بچكۆله‌كه‌م

پێكه‌نینی به‌ساڵاچووان ده‌گمه‌نه‌

ئه‌وه‌یه‌ هۆی گران بوونی

تێنه‌گه‌یشتم چی ده‌ڵێ

هه‌ردوو پێكه‌نینه‌كه‌مم فرۆشتێ و

پسكوویتێكم پێ كڕی

هاتمه‌وه‌ ماڵێ

له‌ دایكمم پرسی به‌ڵكو ئه‌گه‌ر

باوكم پێكه‌نینی كۆنی هه‌بێ

پێكه‌نینی به‌ساڵاچووان زۆری ده‌كا

دایكم هه‌موو ماڵێ گه‌ڕا

پێكه‌نینێكی باوكمی نه‌دۆزیه‌وه‌

(باوكم پێناكه‌نێ)

لێ زۆر له‌ فرمێسكه‌كانی دۆزییه‌وه‌ و

وتی:

ئه‌وه‌ ڕۆژانه‌ی به‌یانیته‌.

 

ڕۆژی پاشی

كه‌ گوێم له‌ ده‌نگی مام دێوه‌ره‌ بوو

ڕام كرده‌ لای

لێم پرسی:

فرمێسكی به‌ساڵاچووان به‌ چه‌نده‌

دیاره‌ ده‌بێ وه‌ك پێكه‌نینیان گران بێ؟

وتی: فرمێسكی پیره‌مێردان هه‌رزانه‌

ئه‌و مامه‌ڵه‌ی پێ ناكا !

به‌ساڵاچووان هه‌میشه‌ ده‌گرین

 

كوڕم ، شه‌قامی سه‌رپه‌ڕێنخانان

ڕووبارێك فرمێسكی لێیه‌

گۆڕستان ڕووبارێكی دی

ته‌نانه‌ت ژنی ‌شه‌هید یوسف

دوو به‌رمیل فرمێسكی هه‌بوو لێم نه‌كڕی!

ڕۆڵه‌ من

پێكه‌نینی به‌ساڵاچووان ده‌كڕم

به‌ڵام فرمێسكیان نا، ناكڕم

من بازرگانی ده‌گمه‌نانم

شه‌ره‌ف له‌ سۆزانییان ده‌كڕم

درۆ له‌ دایكان و

حیكمه‌ت له‌ شێتان و

وه‌فا له‌ به‌رپرسان ده‌كڕم .

كوڕم‌!

من كارم به‌ فرمێسكی به‌ساڵاچووان نییه‌

به‌ساڵاچووان هه‌موویان ده‌گرین.

پاشان به‌ گوێیدا چرپاندم:

ڕۆڵه‌ ئه‌مڕۆ هه‌ینییه‌

ئه‌گه‌ر ڕاستیت له‌ خوتبه‌ی مه‌لادا دی

بۆم بێنه‌ ، زۆری ده‌كا لێت ده‌كڕم .

 

(*) له‌ ماڵپه‌ڕی https://arami.ahlamontada.com/t6218-topic  كراوه‌ به‌ كوردی

ناوی خاوه‌نی له‌سه‌ر نییه‌، پێده‌چێ به‌شێك بێ له‌ كولتووری میلله‌تێك چوون له‌  چه‌ندان ماڵپه‌ڕی تریش هه‌ر به‌ بێ ناو بڵاو كراوه‌ته‌وه‌ و وه‌ك سترانیش به‌ توركی له‌لاین سترانبێژێكی ئافره‌تی تورك وتراوه‌.

گەڕان بۆ بابەت