شێعر و پەخشان

زیاد ڕەشاد قادر

ریشى شیعرم سپى دەبێ و بە دەستى بەتاڵ دێمەوە

 زیاد ڕەشاد قادر

(مەولەوى) لە داخى کۆست و فیراقى عەنبەر خاتوونێ

بینایى چاوانى داهات

وەلێ هەورى خەیاڵى ئەو ئاودارتر و

چاوى شیعرى بیناتر بوو

***

(نالى)ى مەزن بۆ حەبیبەى زێد و یار و نیشتمانى

دڵى بوو بە دەرد و کەباب

ڕۆحى بوو بە شارى ئەشک و شاراى گریان

لێ خەرمانى چامەى ئیشقى بەفەڕتر و

ئاگرى  پەیڤ و هەڵبەستى گەرمتر بوو

***

(حاجى قادر) کڵۆ کڵۆ توایەوە

لە حەسرەت بێکەسیى کوردان

گڕى غوربەت سەر ئەرزى لێ کرد بە زیندان

بەڵام وەجاخى هۆنراوەى ڕۆشنتر و

دەغڵى بەیتى سەوزتر بوو

***

کەچى منى دەستکورتى باخى خەیاڵ و

نەدارى بازاڕى شیعر و

قەلەندەرى وارى وشە

دێوى دوورى دڵۆپ دڵۆپ

لە خوێنى تەمەنم دەخوا

خەزانى خەم گەڵا گەڵا

لە بەهارى عومرم دەبا

ئەوجا بەم زمانە کورت و

زەینە پەرت و بڵاوەوە

بەم ئەندێشە کەم و تەنک و خامە کول و شکاوەوە

نە دەتوانم بە قەد قوڵیى ناڵەى فیراق

هاوارى خۆم بنووسمەوە

نە پێم دەکرێ

ئەم شاخى قورسى دەردانە

بکەم بە قەسیدەى ئیشق و

بە دیارى بۆتان بێنمەوە

بۆیە ئەفسووس ئەم زستانە

ڕیشى شیعرم سپى دەبێ و

بە دەستى بەتاڵ دێمەوە