چیرۆکنووسی ئیسلامی و چیرۆک

چیرۆکنووسی ئیسلامی و چیرۆک

^{لە یوتوپێکدا کە بە بۆنەی رۆژی قەڵەم، لە جەشنوارەیەکی ئەدەبیی چیرۆکدا کە لە ساڵی ٩٢ ی هەتاوی لە تاران بەڕێوە چووە، کەسێک کە وێ دەچێ مامۆستایەکی زانکۆ بێ، سەبارەت بە چیرۆک زیاتر لە یەک سەعات قسە دەکات. سەردێڕیی قسەکانیی ئاماژەپێدراو، بریتیە لە "ناسینەوەی تیۆریانەی چیرۆکنووسیی ئیسلامی".}

^{میتۆدی قسەکانی وتەبێژ، زۆرتر بریتییە لە ناسین و نەفی چیرۆکنووسانی بە قەولی ئەو نائیسلامی، تا لەم رێگایەوە بتوانێ بە شێوازی ناڕاستەوخۆ بڵێ کە مەبەستی لە چیرۆکنووسی ئیسلامی چییە. ئەوەی مەبەستی ئەوە، کورت و بڕاوە ئەوەیە کە هەموو چیرۆکێک خاوەنی ئایدیۆلۆژیا و نێوەڕۆکێک و پەیامێکە، جا چ نووسەرەکەی بزانێ و چ نەزانێ. وە چونکا ئەم نێوەڕۆک و پەیامە زۆرتر بریتییە لە چاندنی تۆڤی بێ هیوایی و پووچگەرایی و بەڕەڵڵایی، کەواتە وەها چیرۆکگەلێک ئیزنی ئەوەیان نیە بە ناوی هونەرەوە (هەرچەند لە قەوارەدا لە هونەر بچن)، بڵاو ببنەوە. چونکە دەبنە هۆی بڵاوکردنەوەی بێهیوایی و پووچگەرایی و بەڕەڵڵایی.} 

^{بەڵام دەکرێ ئەم پرسیارانە ئاراستەی ئەو بەڕێزە بکرێ کە بە ناوی ئیسلامەوە دەدوێ:} 

^{ـ چیرۆکی مودێڕن کە ژانرێکی نوێیە و تەمەنی بۆ ئەوپەڕی سەد و پەنجا ساڵ دەگەڕێتەوە، ئایا لە قورئان باسی کراوە و قەدەغە کراوە کە ئەو ئاوا بێ ترس قەدەغەی دەکا؟!}

^{ـ چ چیرۆکنووسێک تا ئیستاکە دنەی خەڵکی داوە ببنە لەشفرۆش و خۆیان لە سۆزانیخانەکان بفرۆشن؟ ئایا خودی سیاسییەکان بەتایبەت لە جۆری ئیسلامییەکانیان بە هۆی لێنەهاتوویی لە بەڕێوەبردنی وڵات نەبوونەتە هۆکاری برەو پێدانی نائەخلاقی و لەشفرۆشی؟ بۆچی کاتێک چیرۆکنووسێ دێت و باس لەم کارەساتە دەکا، ئەوان وا پێی هەڵدەبەزنەوە؟!}

^{ـ چیرۆک شێوازێکە بۆ ناسین، هەر وەک زانست. وەک چۆن زانست مافی ئەوەی هەیە باس لە لەشی مرۆڤ بکا، چیرۆکیش مافی ئەوەی هەیە لە رێگای باسکردن لە سەر لایەنە سێکسی و ئەخلاقییەکانی مرۆڤ، باشتر مرۆڤ لەم بەشانە ئاگاداربکاتەوە و زانیاری لە سەریان بباتە سەرەوە. بەتایبەت کە هونەر لە رێگای هەڵخڕاندنی هەستەوە دەتوانێ قوڵایی کارەساتەکانی لایەنە ناشیرینەکانی وجود و ژیانی مرۆڤ باشتر پیشان بدات. داخۆ ئەم بەڕێزە بەم قەدەغە کردنانە، نابێتە هۆی بەرگریکردن لە رەوتێکی گرینگی ناسین و، چارەسەرکردنی لە کۆمەڵگادا؟}

^{ـ بێژەر لە قسەکانیدا وا دەنوێنێ کە گوایا یەکێک لە هۆکارەکانی بەڕەڵڵای و نائەخلاقی لە رۆژئاوا و کۆمەڵگا نائیسلامییەکاندا شێوازی چیرۆکی نائیسلامییە. دەکرێ ئەم بەڕێزە بۆمان شی بکاتەوە کە بۆچی چیرۆکی بەناو ئیسلامی تا ئیستا لە هیچ وڵاتێکی ئیسلامیدا نەیتوانیوە کێشە ئەخلاقییەکان چارەسەر بکا و بە پێچەوانەوە لەشفرۆشی و دابەزینی ئاستی موڕاڵ لەم جۆرە وڵاتانەدا یەکجار لەچاو وڵاتانی رۆژئاوایی لەسەرترە؟}

^{ـ چۆنە پیاوە گەورە ئایینیەکان ئیزنی ئەوەیان هەیە لە کتێبەکانیاندا باسی شێوازی سێکس کردن (سێکس کردن لە گەڵ کچی نۆ ساڵە) بکەن، بەڵام چیرۆکنووسێ ئیزنی ئەوەی نیە؟} 

^{وتەبێژ، چونکە زەینی خۆی زۆر قاڵبییە و لە چوارچێوە دراوە و، بە گوتەی خۆی "گزینشی"ە، پێی وایە هەموو چیرۆکنووسان وەک خۆی خاوەنی وەها زەینێکی قاڵبی و بە توندی ئایدیۆلۆژیزەکراون و، بۆیە هەوڵ دەدات لە ناو بەرهەمەکانی ئەواندا بەردەوام بە شوێن گوناح و تاواندا بگەڕێ. ئەو لە بیری چووەتەوە وەک چۆن لە ئیسلامدا دەگوترێ مرۆڤ خاوەنی دوو بەشی خراپە و چاکەیە، کاری چیرۆک ئەوەیە کە بە ڕووخستنی هەر دووکی ئەم بوارانە، ئەوە بیری مرۆڤ بێنێتەوە کە ژیانکردن چەند ئەرکێکی قورسە.} 

^{ئەرکی چیرۆک باس کردن و پەردە لە سەر شتە شاراوەکان لادانە. ئەوەیکە خوێنەر و کۆمەڵگا چلۆن لە گەڵ ئەم شتە رووکراوانە مامەڵە دەکەن، باسێکی دیکەیە کە فڕی بە سەر چیرۆکنووسەوە نیە.}

^{سایتی قەڵەم}

^{٣ ئۆگوستی ٢٠١٦}